Baş Narkotiklərlə Mübarizə İdarəsinin əməkdaşları tərəfindən narkotik vasitə və psixotrop maddələrin satışı ilə məşğul olan daha bir şəxs saxlanılıb.
DİN mətbuat xidmətindən Xeberle. com-a daxil olan xəbərə görə, Sumqayıt şəhərində keçirilən əməliyyat zamanı narkotiklərin qanunsuz dövriyyəsində şübhəli bilinən Qubadlı rayon sakini Ramin Qasımlı tutulub. Şəxsi axtarış zamanı onun üzərindən 2 qram metamfetamin aşkar edilib.
Ramin Qasımlının idarə etdiyi "Lada” markalı avtomobilin yük yerindən isə 12 kiloqram heroin və 3 kiloqram metamfetamin tapılıb. Sonuncu əməliyyat nəticəsində 15 kiloqramdan artıq narkotik vasitə qanunsuz dövriyyədən çıxarılıb.
Araşdırma zamanı müəyyən olunub ki, saxlanılan şəxs hələlik adı istintaqa məlum olmayan İran vətəndaşının tapşırığı ilə qanunsuz yollarla Azərbaycan ərazisinə keçirilən külli miqdarda narkotik vasitələri Yardımlı rayonunda qəbul edib və Sumqayıt şəhərinə gətirərək satışını təşkil etmək istəyib.
Faktlarla bağlı cinayət işi başlanılıb, araşdırma aparılır.
Xəbərdən istifadə edərkən istinad etmək vacibdir.
