Duz səpmək onun vəzifə borcu deyil, sadəcə, insanlıq naminə bunu edir.
Dünəndən bəri sosial şəbəkələrdə Bakıda yol polisi əməkdaşının qarlı havada yola duz səpməsini əks etdirən video yayılıb. Videoda DYP əməkdaşının mağazada qutuda satılan xörək duzunu yola səpməsi əksini tapır. Çoxları bu görüntülərdəki yol polisini ələ salan, qınayan fikirlər yazır.
Xəbərlə.com avtosfer-ə istinadən verdiyi məlumata görə, əvvəla, yol polisinin nə qanunvericiliklə, nə də "Yol-patrul xidməti haqqında” təlimatla yolda qar təmizləmək, buzda sürüşən avtomobilləri itələmək və digər bu kimi xidmətlər göstərmək öhdəliyi yoxdur. Onların işi yolda hərəkətin təşkilini və təhlükəsizliyini təmin etməkdir.
Əslində, bunu Bakı Şəhər İcra Hakimiyyəti və "Azəravtoyol” ASC-nin əməkdaşları xüsusi texnikalarla etməli idi. Lakin görünür, onlar bu küçələrə düz və ya qum səpmədiyi üçün yol polisi əməkdaşı xidməti ərazisində nəcib bir hərəkətlə qəza riskini azaltmağa çalışıb.
Polisin bu davranışı alqışa layiqdir. Bu kiçik hərəkətlə böyük bir iş gördü. Bakıda bizim yol polisi əməkdaşının bu insanlıq dərsi, yəqin ki, başqa ölkələrdə baş versəydi, indi onu "dünyanın nəcib polisi” kimi qələmə verənlər də tapılardı. Bu polis böyük iş görüb. Bunu danmaq olmaz. Onun böyük işini kiçik görənlər isə kiçik adamların işidir.

Xəbərdən istifadə edərkən istinad etmək vacibdir.