Hədiyyə vermək diplomatik etikanın ayrılmaz atributuna çevrilib. Dövlət başçıları, diplomatlar maraqlı və qeyri-adi hədiyyələr vermək üçün sanki bir-biri ilə rəqabətə girirlər. Belə hədiyyələr arasında - canlı heyvanlar, kitablar, DVD disklərə və digər əşyalara rast gəlmək olar. Diplomatiya tarixinin ən qəribə hədiyyələrini təqdim edirik.

 

Ata Corc Buş 1990-cı ildə İndoneziya hökumətindən qeyri-adi hədiyyə alır. Ona kərtənkələkimilər sinfinə aid ən böyük heyvan növü olan Komod çöl kərtənkələsi bəxş olunur. Böyük tarixi əhəmiyyəti olan çöl kərtənkələsi Buş tərəfindən Sinsinatti zooparkına hədiyyə olunur. Zooparkda çöl kərtənkələsi 130 kiloqrama qədər çəki toplayır.

Ümumiyyətlə, İndoneziyada Komod çöl kərtənkələsi özündən iki dəfə böyük heyvanları (maral, kəl) ovladığına görə milli sərvət hesab olunur.

 

2008-ci ildə isə oğul Corc Buş başqa bir qeyri-adi hədiyyə alır. Texas ştatından olan və ət həvəskarı kimi tanınan prezidentə argentinalı həmkarı 130 kiloqram quzu əti göndərir. Sonralar Corc Buş təhlükəsizlik xidmətinin çoxsaylı yoxlamalarına görə ətin dadına baxa bilməməsindən gileylənib. Amma Argentina prezidentinə jestinə görə minnətdarlıq etməyi də unutmayıb.   

 

2009-cu ildə isə ABŞ-ın yeni prezidenti Barak Obama Fələstin Muxtariyyətinin rəhbəri Mahmud Abbasdan maraqlı hədiyyə alıb. Abbas yeni prezidentə zeytun yağı butulkası hədiyyə edib. 75 dollar qiyməti olan butulka Obamanın prezidentliyi dövründə aldığı ən ucuz hədiyyələrdən sayılır. Obamanın həmin yağdan istifadə edib-etmədiyi məlum deyil.   

 
Uzun illər ABŞ-la Rusiya arasında davam edən gərgin münasibətlərə son qoymaq üçün Amerikanın dövlət katibi Hillari Klinton Rusiya xarici işlər naziri Sergey Lavrova üzərində qırmızı nöqtə olan sarı qutu hədiyyə edib. Üzərində ingiliscə "resert” və rusca "perezaqruzka” yazılan bu qutu ölkələr arasında əlaqələrin normallaşmasında simvol rolunu oynamalı idi.   

 

2010-cu ildə isə Rusiya prezidenti Vladimir Putin Bolqarıstanın baş naziri Boyko Borisovdan "Yelou” ləqəbli 10 həftəlik bolqar ovçarkası (çoban iti) hədiyyə alıb. Bu hədiyyəni qeyri-adi edən çoban itinin qısa zamanda Putinin və dünya jurnalistlərinin sevimlisinə çevrilməsi idi. Təsadüfi deyil ki, buna görə Boyko Borisovun Putinə etdiyi hədiyyəni "diplomatiya tarixinin ən xoş hədiyyəsi” adlandırırlar.   

 

2013-cü ildə Rusiyanın İrandakı səfiri İran Müdafiə Nazirliyinin Baş Qərargah rəisi tərəfindən maraqlı hədiyyə alır. Hədiyyə İran hava məkanını pozan və yerli hərbçilər tərəfindən vurularaq məhv edilən pilotsuz təyyarənin kiçik modeli idi. Sonradan bu kiçik modellər İranın əksər dükanlarında satışa çıxarılıb.   

 

Pentaqonun sabiq rəhbəri Donald Ramsfeld isə ən həyəcanlı hədiyyələrdən birini alıb.

2011-ci ildə nəşr edilən xatirələrində Ramsfeld 1983-cü ildə İraq prezidenti Səddam Hüseynlə görüş zamanı ona 3 dəqiqəlik videonun təqdim olunduğunu xatırlayır. Videoda ilanların başını dişləyərək qopardan və it küçüklərini bıçaqla doğrayan suriyalı uşaqlar və onların arxasında dayanaraq qəhqəhə çəkən Suriya diktatoru Hafiz Əsəd təsvir olunmuşdu.         

 

2011-ci ilin noyabrında Avstraliyanın şimalına səfər edən Barak Obama baş nazir Pol Henderson tərəfindən dəyəri 50 min dollar olan sığorta polisi alır. Həmin sığorta Amerika prezidentinin təhlükəsizlik xidmətinin səhlənkarlığa yol verməsi ilə bağlı idi. Belə ki, Avstraliyanın baş naziri həmkarını regionda sıx rast gəlinən timsahların hücumundan sığortalamaq  üçün bu addımı atmışdı.   

 

Çinlilər xarici siyasətçilərə ölkənin simvollarında sayılan pandalar hədiyyə etməklə məşhurdur. 1958-ci ildən bəri 100-dən artıq panda dövlət başçılarına hədiyyə olunub. 1972-ci ildə Amerika prezidenti Riçard Nikson da Linq-linq və Hinq-hinq adlı iki panda hədiyyə alır. O, cavab olaraq çinli həmkarına 2 cüt bizon hədiyyə edir.      

 

2013-cü ildə Fransa Afrikadakı ən kasıb ölkələrdən biri olan Maliyə yardım göstərir. Ölkənin şimalını işğal edən radikal dini ekstremistlərə qarşı fransız əsgərləri göndərilir. Mali hökuməti prezident Ollanda bu yardımı üçün təşəkkür əlaməti olaraq dəvə hədiyyə edir. Lakin az sonra Olland dəvəni Malinin Timbuktu şəhərindəki ailələrdən birinə hədiyyə edir. Onlar isə öz növbəsində dini bayramla əlaqədar olaraq dəvəni kəsərək ətindən bayram süfrəsində təam hazırlayırlar.    (modern.az)

Xəbərdən istifadə edərkən istinad etmək vacibdir.