İqtisadi Zonaların İnkişafı Agentliyinin Peşə Təhsil Mərkəzində "tələbələrin milli vətənpərvərlik ruhunda formalaşmasının təbliği" mövzusunda qazilərlə görüş keçirilib. Əvvəlcə, Azərbaycan Respublikasının Dövlət Himni səsləndirilib və ölkəmizin azadlığı və ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib. Görüşün keçirilməsində əsas məqsəd Vətən müharibəsində yaralanmış qazilərimizi, onların göstərdikləri igidlik və şücaəti tələbələrə tanıtmaq, onları vətənə məhəbbət ruhunda tərbiyə etmək olmuşdur.
Mərkəzin Direktoru Kənan Bağırov tədbiri açaraq 44 günlük Vətən müharibəsində Azərbaycan Ordusunun Prezidenti, Müzəffər Ali Baş Komandanımızın rəhbərliyi ilə xalqımızın parlaq Qələbə qazandığını vurğulayıb. O, şanlı Zəfərin qazanılması uğrunda canından keçən Vətən övladlarının xatirəsinin xalqımız tərəfindən ən yüksək hörmət və ehtiramla anıldığını qeyd edib. Bildirib ki, Azərbaycan Vətən müharibəsində parlaq qələbə qazanmaqla qəhrəmanlıq salnaməsinin ən unudulmaz tarixini yazdı. Bu tarixi yazan cənab Prezident, Müzəffər Ali Baş Komandan İlham Əliyev başda olmaqla Azərbaycan Ordusunun əsgəri və zabitləridir.
Görüşdə çıxış edən Vətən müharibəsi iştirakçısı Polkovnik Leytenant Rəşad Salmanov
keçdiyi həyat və döyüş yolundan söhbət açıb. Qarabağ qazisi şagirdlərin diqqətinə çatdırıb ki, Vətəni sevməyin, onu qorumağın başlıca yolu dərin biliklərə yiyələnib, savadlı kadr kimi yetişməkdir.
Vətən müharibəsi qaziləri 44 günlük Zəfər yolundan danışaraq ən ağır döyüşlərdə belə şəxsi heyətin əhvali-ruhiyyəsinin, döyüş əzminin yüksək olduğunu vurğulayıb, Ordumuzun qəhrəmanlıq nümunələrindən danışıblar. Onlar torpaqlarımız işğaldan azad olunduqca hərbçilərimizin daha çox sevindiklərini, onların keçirdikləri hisslərin sözlə ifadə edilməsinin mümkünsüzlüyünü dilə gətirib.
Sonra tələbələrimizin ifasında şəhidlərimizə və qazilərimizə həsr olunmuş ədəbi-bədii kompozisiya təqdim olunub.
Qazilər müharibə ilə bağlı xatirələrindən, unudulmaz anlarından bəhs etdilər, görüş iştirakçılarını maraqlandıran sualları cavablandırdılar.
Xəbərdən istifadə edərkən istinad etmək vacibdir.
