Abşeron-Xızı Regional Təhsil İdarəsinin tabeliyində fəaliyyət göstərən Sumqayıt şəhər 6 nömrəli tam orta məktəbdə Ümumdünya Kitab və Müəlliflik Hüququ gününə həsr olunan, ibtidai, orta və yuxarı sinif şagirdlərinin iştirakı ilə "Kitabdan-səhnəyə” adlı ədəbi-bədii tədbir keçirilib. Məqsəd şagirdlərdə kitaba olan sevgini aşılamaq, onların səhnə üzrə xüsusi qabiliyyət və bacarıqlarını kəşf etmək və istedadlarını üzə çıxarmaqdır.
Tədbidə Abşeron-Xızı Regional Təhsil İdarəsinin müdiri İlhamə Abdullayeva, Sumqayıt şəhər İcra Hakimiyyətinin rəsmiləri, şəhər ağsaqqalları, ictimaiyyət nümayəndələri, məktəbin şagird və müəllim heyəti iştirak ediblər.
Şagirdlər görkəmli Azərbaycan ədiblərinin obrazlarını və məşhur əsərlərdən personajları canlandırıb, müxtəlif əsərlər əsasında səhnəciklər təqdim ediblər. Tədbirdə həmçinin məktəblilərin intellektual səviyyəsini yoxlamaq üçün ümumi dünyagörüşü və bədii ədəbiyyat sahəsini əhatə edən viktorina təşkil olunub.
Sözügedən məktəbdə bu səpkidə tədbirlər mütəmadi olaraq həyata keçirilir və bundan sonra da davam etdiriləcəkdir.
Qeyd edək ki, məktəbin direktoru Gülbahar Haqverdiyeva və onun rəhbərlik etdiyi pedaqoji kollektiv uşaqlara təhsil verməklə yanaşı, onların təlim-tərbiyələri ilə yüksək səviyyədə məşğul olur, dünyagörüşlərinin inkişaf etdirilməsində böyük əmək sərf edir.
İlhamə Məhəmmədqızı
Xəbərdən istifadə edərkən istinad etmək vacibdir.
