Şagird və tələbələr günün əksər hissəsini təhsil müəssələrində keçirir. Bu səbəbdən də məktəb və universitetlərdə iaşə xidmətlərinin təşkili önəm daşıyan mövzulardandır.
Bəs təhsil müəssələrində iaşə obyektləri- bufetlər kimin tabeliyindədir və qida təhlükəsizliyi necə tənzimlənir?
Mövzu ilə bağlı Modern.az-ın sorğusuna cavab verən Məktəbəqədər və Ümumi Təhsil Üzrə Dövlət Agentliyi bildirib ki, ümumi təhsil müəssisələrinin bufet və yeməkxanalarında iaşə xidməti Azərbaycan Respublikası Nazirlər Kabinetinin "Təhsil müəssisəsində iaşə və tibb xidmətinin təşkili Qaydası və Normalarının təsdiq edilməsi haqqında” Qərarına, "Təhsil müəssisələrində təhsil və tərbiyə alanların qidalanması üzrə Dövlət Standartı”na və "Təhsil müəssisələrinin tikintisinə, maddi-texniki təchizatına dair vahid normalar, ümumi sanitariya-gigiyena tələbləri, şagird yerləri ilə təminat normativlərinin təsdiq edilməsi haqqında” Qərarına uyğun qaydalara əsasən aparılır və daim nəzarətdə saxlanılır.
Qurumdan o da bildirilib ki, "Təhsil haqqında” Azərbaycan Respublikası Qanununun 28.2. bəndinə əsasən təhsil müəssisələrində iaşə xidməti təhsil müəssisəsi ilə iaşə xidməti göstərən hüquqi və fiziki şəxslər arasında bağlanan müqavilə əsasında həyata keçirilir. Bu işdə uzun müddət təcrübəsi olan hüquqi və fiziki şəxslər ilə bağlanan müqavilələr əsasında təhsil müəssisələrində iaşə xidməti göstərilir. Məktəblərdə bufet və yeməkxanaların fəaliyyətinə görə bağlanmış müvafiq müqavilə çərçivəsində iaşə xidməti göstərən müəssisələr məsuliyyət daşıyır. Bununla belə, məktəblərdəki bufet və yeməkxanalara mütəmadi olaraq aidiyyəti dövlət qurumları ilə birgə nəzarət tədbirləri həyata keçiriilir. Aparılan monitorinqlərin nəticələri təhlil olunur və ehtiyac olduğu halda zəruri tədbirlər görülür.
Məktəbdə satışı qadağan olunmuş hər hansı məhsulun bufetdə olmamasına ciddi nəzarət edilir.
Xəbərdən istifadə edərkən istinad etmək vacibdir.
