İqtisadi Zonaların Peşə Təhsil Mərkəzində həyata keçirilən “4D Dual TVET” layihəsinin birinci mərhələsi sona çatıb -FOTOLAR

Tarix: Bu gün, 16:25 Oxunma sayı: 34 Bölmə: Təhsil / Sumqayıt

"4D Dual TVET” layihəsinin Azərbaycan üzrə birinci mərhələsinin bağlanış tədbiri keçirilib.

Xeberle.com xəbər verir ki, tədbirdə İqtisadi Zonaların İnkişafı Agentliyi nəzdində Peşə Təhsil Mərkəzinin direktoru Kənan Bağırov, Peşə Təhsilinin İnkişafı Fondunun İdarə heyətinin sədri İdris Musayev, Bildungswerk der Baden-Württembergischen Wirtschaft e.V (BIWE) təşkilatının Beynəlxalq Layihələr üzrə Meneceri Astrid Lommek, Azərbaycan üzrə Layihə meneceri Mehmet Çakar, Peşə Təhsili üzrə Dövlət Agentliyinin, Bakı Sənaye və İnnovasiyalar üzrə Peşə Təhsil Mərkəzinin, Cəlilabad Dövlət Peşə Təhsil mərkəzinin, Coders Azərbaycan şirkətinin, "SOCAR-Fugro” MMC-nin, ATL Academy-nin, Kapital Bankın nümayəndələri və digər qonaqlar iştirak edib.

Tədbirdə çıxış edən İqtisadi Zonaların İnkişafı Agentliyi nəzdində Peşə Təhsil Mərkəzinin direktoru Kənan Bağırov bu layihənin 2021-ci ildən Mərkəzdə uğurlu həyata keçirildiyini, tələbələrin İKT istiqaməti üzrə təhsil almaları ilə yanaşı şirkətlərdə praktik biliklərə yiyələndiyini və onların səriştələrinin formalaşdığını vurğulayıb. O çıxışı zamanı layihənin həyata keçirilməsinə dəstək göstərən Bildungswerk der Baden-Württembergischen Wirtschaft e.V (BIWE) təşkilatının Meneceri Astrid Lommekə və Azərbaycan üzrə Layihə meneceri Mehmet Çakara təşəkkür edib.

Tədbirdə təqdimatla çıxış edən Azərbaycan üzrə Layihə meneceri Mehmet Çakar, layihənin Almaniya Federativ Respublikasının İqtisadi Əməkdaşlıq və İnkişaf Nazirliyi tərəfindən "Sequa" təşkilatı vasitəsilə maliyyələşməsi və "Bildungswerk der Baden-Württembergischen Wirtschaft e.V" (BIWE) təşkilatı tərəfindən icra olunması, eləcə də layihənin birinci mərhələsində həyata keçirilən fəaliyyətlər və nailiyyətlər haqqında geniş məlumat verib, layihənin hədəf qruplarına olunan dəstəyini və layihənin icrasında əməkdaşlıq imkanlarının əhəmiyyətini vurğulayıb.

Tədbir zamanı digər qonaqların və tədbir iştirakçılarının çıxışları dinlənilib, eləcə də İqtisadi Zonaların İnkişafı Agentliyi nəzdində Peşə Təhsil Mərkəzinin tələbələrinin rəqs kompozisiyası təqdim edilib.