Bu günlərdə Sumqayıt məktəblərinin əksəriyyətində hər sinifdən 30 manat pul yığılmasına dair göstəriş verilməsi ilə bağlı redaksiyamıza müraciət daxil olub. Qeyd edilir ki, 30 manat deyilsə də, məktəblərdə hər sinfə 60 manat yığılması tapşırılıb.
Redaksiyamıza daxil olan məlumata görə, bu məbləğin "Sumqayıtda Novruz bayramı ilə əlaqədar şəhər tədbirinə” yardım adı altında yığıldığı bildirilib.
Nəzərə alsaq ki, şəhər tədbirini hər müəssisə özü qarşılayıb, onda bu məbləğin hansı məqsədlə yığılması müəmmalı qalır.
Əldə etdiyimiz məlumata görə, məktəb rəhbərlikləri bu göstərişin icra hakimiyyətindən verildiyini vurğulayıblar.
Amma ortaya sual çıxır. Tutaq ki belə bir göstəriş var və hər sinfə görə 30 manat yığılır. Bəs niyə siniflərdə hər şagirddən 2 manat istənilib?
Nəzərə alaq ki, hər sinifdə orta hesabla 30 şagird var. Əlavə məbləğ hara və ya kimin cibinə gedir?
Etibarlı mənbədən aldığımız məlumata görə, icra hakimiyyəti belə bir tapşırıq verməyib. Eyni zamanda qeyd edək ki, artıq neçə illərdir ki, təhsil idarələri regional statusuna keçdiyindən yerli icra hakimiyyətlərinə tabelik mövcud deyil. Burdan belə aydın olur ki, tapşırıq regional təhsil idarəsindən verilib.
Bu hal bir məktəbdə baş versəydi, məktəb rəhbərliyini taqsırkar hesab etmək olardı. Kütləvi hal olduğundan söyləmək olar ki, birbaşa idarə tərəfindən verilmiş göstərişdir.
Məsələ ilə bağlı qarşı tərəfə müraciət etdik. İdarənin açıqlamasını olduğu kimi təqdim etməyə hazırıq.
Xəbərdən istifadə edərkən istinad etmək vacibdir.
