Sumqayıt şəhər 11 nömrəli tam orta məktəbdə Azərbaycan Respublikasının Prezidenti yanında Bilik Fondunun xətti ilə "İl boyu bilik” proqramı çərçivəsində mühazirə təşkil olunub. Bilik Fondunun mühazirəçisi, Sumqayıt Şəhər Təhsil Şöbəsinin metodisti Əlhəddin Paşayev "Heydər Əliyev Azərbaycan multikulturalizminin siyasi banisidir” mövzusunda mühazirə ilə çıxış edib. Tədbirdə məktəbin direktoru, "Əməkdar müəllim", "Şöhrət” ordenli Ofelya Babayeva, həmçinin 9-11-ci sinif şagirdləri və bəzi müəllimlərin iştirakı təmin edilib.

Mühazirəçi Əlhəddin Paşayev Bilik Fondunun fəaliyyəti, həyata keçirdiyi layihələr barədə ətraflı məlumat verərək bildirdi ki, əsas məqsəd Azərbaycan Respublikasının əhalisini maarifləndirmək, dövlətin daxili və xarici siyasətini, ictimai-siyasi və sosial-iqtisadi proseslərin mahiyyətini ictimaiyyətə çatdırmaq; ölkə əhalisinin elmi-texniki, siyasi-ictimai, sosial-iqtisadi, ekoloji və humanitar biliklərini artırmaq məqsədilə təşkilati və təbliğat xarakterli tədbirlər həyata keçirməkdir. Fond həyata keçirdiyi layihələrlə Azərbaycan Respublikasının əhalisinə qloballaşma şəraitində cərəyan edən proseslər haqqında dolğun biliklər çatdırmaq, gənclərin bilik və bacarıqlarının, peşəkarlıq səviyyələrinin və dünyagörüşünün inkişafına dəstək göstərməkdədir. O, layihələrdə təhsil işçilərini, müəllimləri yaxından iştirak etməyə dəvət edib. Sonra mühazirəçi tərəfindən slaydlarla təqdimat keçirildi və Bilik Fondunun aylıq bülletenləri nümayiş etdirildi; Fondun həyata keçirilən işlər, uğurlu nəticələr barəsində geniş məlumat verildi.

Əlhəddin Paşayev öz mühazirəsində qeyd etmişdir:

– Multikulturalizm – eyni bir ölkədə yaşayan müxtəlif xalqların nümayəndələrinin mədəniyyət hüquqlarını tanıyan humanist dünyagörüşü və ona uyğun olan siyasətdir. Xalqımızın ümummilli lideri Heydər Əliyevin siyasi iradəsi nəticəsində Azərbaycan tarixən sahib olduğu tolerantlıq və multikulturalizm ənənələrini hüquqi və siyasi müstəvidə yenidən bərpa etdi. Heydər Əliyev Azərbaycanın gələcək uğurlu inkişafı üçün dəqiq ideoloji hədəf seçdi və öz uzaqgörən, müdrik siyasəti ilə əsrlər boyu formalaşan çoxmədəniyyətlilik ənənəsini inkişaf etdirərək onu keyfiyyətcə yeni mərhələyə qaldırdı. Birmənalı şəkildə qeyd etmək olar ki, Ulu Öndər Azərbaycan multikulturalizminin siyasi banisidir. Heydər Əliyevin təşəbbüsü və göstərişi ilə milli azlıqların ədəbiyyat, mədəniyyət, dil, tarix, adət-ənənələrinin qorunub saxlanmasına, inkişaf etdirilməsinə qanuni zəmin yaradıldı. Azərbaycanın multikultural ənənələrinin dövlət tərəfindən qorunması işində ən vacib olanı Ümummilli Lider Heydər Əliyevin təşəbbüsü və göstərişi ilə bu məsələnin hüquqi sənədlərdə, o cümlədən Azərbaycan Respublikasının Konstitusiyasında əks olunmasıdır.

Bu gün Azərbaycanda multikulturalizm sahəsində bir-birini tamamlayan, sistemli xarakter daşıyan siyasi iradə və onun gerçəkləşməsi proqramı uğurla həyata keçirilir. Akademik Kamal Abdullayevin qeyd etdiyi kimi, "tarixi prosesdə formalaşan etnik-mədəni müxtəlifliklər (çoxmədəniyyətlilik, multikulturalizm) və onların əsasını təşkil edən etnik-mədəni dəyərlər xalqların və dövlətlərin inkişafında mühüm rol oynayır. Lakin bu müxtəlifliklər dövlət tərəfindən tənzimlənmədikdə və yaxud düzgün tənzimlənmədikdə, ölkədə uyğun multikultural siyasət formalaşmadıqda ciddi problemlər, hətta münaqişələr baş verir. Buna görə də bu müxtəlifliklərin düzgün tənzimlənməsi çoxmədəniyyətli dövlət üçün böyük əhəmiyyət kəsb edir”.

Məktəbin direktoru Ofelya xanım rəhbərlik etdiyi təhsil ocağının müəllim və şagird kontingentinin Bilik Fondu ilə birgə səmərəli layihələr gerçəkləşdirə biləcəklərinə əmin olduğunu vurğulayıb. Həmçinin müəllim və şagirdlərin Bilik Fondunun layihələrində iştirak etməyə hazır olduqlarını bildirmişdir.

Təşkilatçılıq işinin yüksək səviyyədə baş tutması sayəsində mühazirəçi öz çıxışını günün tələbinə uyğun səviyyədə qura bilmiş və mövzuya dair ayrı-ayrı məqamları dinləyicilərə çatdırmışdır. Mühazirə, müəllimlər və şagirdlər tərəfindən diqqətlə dinlənilmiş; tədbirdə əməkdaşlığın perspektivliyi barədə fikir mübadiləsi aparılmış, sonda dinləyiciləri maraqlandıran çoxsaylı suallara mühazirəçi tərəfindən aydınlıq gətirilərək cavablandırılmışdır.

Tədbir iştirakçıları Bilik Fondunun maarifçilik fəaliyyətini yüksək qiymətləndirməklə yanaşı, belə mühazirələrin tez-tez təşkil olunmasının tərəfdarı olduqlarını bildirmişlər.

Vəfa Novruzəliyeva,

Sumqayıt şəhəri 11 nömrəli tam orta məktəbin tarix müəllimi