Bildiyimiz kimi, keçən il paytaxtın ümumtəhsil müəssisələrində çalışan müəllimlərin Sınaq Qiymətləndirilməsi keçirildi. Xatırladaq ki, Sınaq Qiymətləndirilməsi diaqnostik tətqiqat xarakteri daşıyır və müəllimlərin atestasiyasına hazırlıq məqsədi güdür. Artıq regionlarda çalışan müəllimlər üçün də sınaq qiymətləndirmə keçirilməsi nəzərdə tutulub. Bu ilin dekabr ayının 21-25 arası isə Sumqayıt müəllimlərinin sınaq imtahanı keçiriləcək. 

    

Bu yaxınlarda Sumqayıtdakı 22 nömrəli tam orta məktəbdə Təhsil Nazirliyinin əməkdaşlarının iştirakı ilə müəllimlərin məlumatlanmasına dair tədbir keçirilib. Həmin tədbirdə nazirlik əməkdaşları keçiriləcək sınaq imtahanlarının cavablarının bir həftədən sonra bilinəcəyini diqqətinə çatdırıblar. Bu isə görüşdə iştirak edən müəllimlərin haqlı narazılığına səbəb olub. Adının çəkilməsini istəməyən tarix müəllimi əməkdaşımızla söhbət zamanı bəzi məqamlara toxunub:"İnternet vasitəsi ilə keçiriləcək imtahanda dərhal cavabları bilmək imkanı olduğu halda, hansı səbəbdən bunu bir həftədən sonraya saxlanılması anlaşılan deyil. Qeyd edim ki, bir müddət öncə internetdə sualları cavablandırmaq üçün imkanlar mövcud idi və avtomatik olaraq nəticələri bildirən həmin proqram şüurlu şəkildə, bilərəkdən qapadılıb.” 

    

Tədbirdə iştirak edən nazirlik əməkdaşları müəllimləri narahat edən suallara çox bəsit və qeyri-ciddi cavab veriblər. Onlar paytaxta keçirilən imtahanların cavablarının da bir həftədən sonra bilindiyini bəhanə gətiriblər və Sumqayıtda nəticələr tez bilinəcəyi halda narazılıq olacağını deyiblər(?).

Xatırladaq ki, Bakıda imtahanlar elektron qaydada deyil, adi şəkildə keçirilib. Bu da texniki baxımdan vaxt apardığı üçün nəticələr bir həftədən sonra elan oluna bilərdi. Sumqayıt müəllimlərini narahat edən əsas məqam Sınaq Qiymətləndirilməsinin cavablarının qeyri-obyektiv olacağı, hansısa neqativ hala yol verilə biləcəyidi. İmtahanın cavablarını dərhal bilmək mümkün olduğu halda, nəyə görə bir həftədən sonra elan olunacağı onlarda şübhələr yaradır. 
moderator.az