Sumqayıt Dövlət Universitetinin (SDU) 55 illik yubileyinə həsr olunan kimya və biologiya üzrə fənn olimpiadasının qalibləri mükafatlandırılıb.
Xeberle.com AZƏRTAC-a istinadən xəbər verir ki, olimpiadaya dekabrın 24-də start verilib və Sumqayıt şəhərindəki orta məktəblərdən kimya və biologiya fənninə həvəs göstərən 9-11-ci sinif şagirdləri və Bakı şəhərində "Kaspi” liseyinin şagirdləri iştirak ediblər. Olimpiada məsələlərinin və ya suallarının qiymətləndirilməsi 10 ballıq sistemlə aparılıb. Hər variantda 5 məsələ və ya 5 sual olmaqla, maksimal qiymət 50 bal təşkil edib. Şagirdlərin nəticələri sistemləşdirilib, 147 şagirddən 37-si qalib olub.
Aprelin 6-da keçirilən mükafatlandırma mərasimində qalibləri SDU-nun rektoru, professor Elxan Hüseynov fəxri fərmanla təltif edib. Rektor qalib şagirdlərə elmimizin və təhsilimizin inkişafı yolunda uğurlar arzulayıb.
Sumqayıt şəhər Təhsil Şöbəsinin müdiri Nizami Namazov çıxış edərək şəhərdə fəaliyyət göstərən ümumtəhsil məktəblərinin SDU ilə sıx əlaqələrinin qurulmasını yüksək qiymətləndirib. O, gələcəkdə də belə olimpiadaların keçirilməsinin vacibliyini diqqətə çatdırıb.
Kimya və biologiya fakültəsinin dekanı dosent Mahal Muradov universitetin dinamik inkişafından bəhs edərək bildirib ki, Polimer Materialları İnstitutunda universitetin baza kafedrasının yaradılması əlaqələrin möhkəmlənməsinə, eyni zamanda, milli təhsilimizin inkişafına töhfələr verir. Həmçinin tələbələrin tədqiqat işlərinin aparılmasında xüsusi önəm daşıyır.
Olimpiada iştirakçıları çıxışlarında yarışın şəffaf və obyektiv keçirilməsinə görə təşkilat komitəsinə minnətdarlıqlarını bildiriblər.

Xəbərdən istifadə edərkən istinad etmək vacibdir.