Sumqayıt şəhərində fəaliyyət goztərən məktəblər bir-biri ilə müsbət rəqabət aparmaqla təhsildə yeni-yeni uğurlar əldə edirlər.

Şəhərdə fəaliyyət göstərən 47 məktəb şəhərin müxtəlif yerlərində yerləşir. Mərkəzdə yerləşən məktəblər ugurları ilə diqqət çəksə də, qəsəbələrdəki məktəblər də heç də onlardan geri qalmırlar. Belə məktəblərdən biri də 9 nömrəli tam orta məktəbdir.

1959 –cu ildən fəaliyyət göstərən 9 nömrəli tam orta məktəb Sumqayıt şəhər İnşaatçılar qəsəbəsində yerləşir. Əyalət məktəbi olaraq bu gün 9 nömrəli tam orta məktəb Sumqayıt təhsilində öndə gedən məktəblər sırasındadır.

Müsahibim Sumqayıt şəhər 9 nömrəli tam orta məktəbin direktoru Bəhruz Səlimxanovdur.

-Bəhruz müəllim sizi və kollektivinizi yeni dərs ilinin başlanması münasibətilə təbrik edir, daha da yeni-yeni uğurlar və naliyyətlər arzulayırıq. İlk ənənəvi sualım belədir: "İlk dəfə auditoriyaya daxil olanda hansı hissləri keçirdiniz?”

-Müəllim peşəsinə həvəs məndə hələ orta məktəbdə oxuyanda oyanıb. Anam müəllimədir. Onun müəllim peşəsinə olan diqqəti və şagirdlərin ona hörmətlə yanaşmaları, sevmələri özümün daha da bu peşəyə bağlılığını hiss etdim.Sonradan onun məktəb direktoru vəzifəsinə təyin olunması,təhsilə ciddi yanaşması, tələbkarlığı və səmimi idarəedici bir rəhbər kimi olması arzularımın gerçəklənməsinə şərait yaratdı. Müəllim kimi ilk fəaliyyətim, şagird kontigentinin qabağına çıxmağım yaşadığım arzularımın gerçəklənməsi idi.

- Bu peşənin məsuliyyətini bilərək karyeranızı qurmağa çalışmısınız. Sizə bu işdə dəstək verən olubmu?

- İlk riyaziyyat müəllimi kimi çalışdığım məktəb 1 nömrəli, eyni zamanda 23 nömrəli məktəb olub. Sonradan isə "Təfəkkür” liseyi olub. "Təfəkkür liseyində direktor müavini təyin olundum. Direktor Bəsirə xanımın əməyi üzərimdə danılmazdır. Çalışdığım müddətdə riyaziyyat fənninin tədrisinə aid bir neçə kitab müəllifi kimi də işim olub.

- Sumqayıt şəhər 9 nömrəli məktəbə direktor vəzifəsinə təyin olunanda hansı çətinliklərlə rastlaşdınız?Kollektivlə münasibətdə mövqeyiniz dəstəkləndimi?

- Gənc bir direktor kimi məktəbə gələndə özümdə inam hissi vardı. Kollektivin öz işinə məsuliyyətlə yanaşması, mənə qarşı səmimi münasibətlərini nümayiş etdirmələri məni daha da ruhlandırdı. Bununla yanaşı çətinliklər olsa da birgə fəaliyyətimizlə aradan qaldırmağa çalışmışıq. Özümün prespektiv planlarımı həyata keçirməklə yanaşı, idarəetmə funksiyasında əvvəlki direktor olan Sevil xanım Kamilovanın dəstəyindən bəhrələnmişik.

- Bəhruz müəllim, işlədiyin altı il müddətində bir neçə dəfə Sumqayıt Təhsil şöbəsinin müdiri dəyişilib. Bu sizə çətinlik yaratmayıbki?

- Təhsil elə bir sahədir ki, məsuliyyət və diqqət tələb edir. Düzdü çətinliklər olmasa da, konkret bir rəhbərin nəzarəti altında fəaliyyətin öz yeri var. Yeni təyin olunan Sumqayıt şəhər Təhsil şöbəsini müdiri Nizami Namazov konkret və tərəqqi qərarları ilə bizə daha da dəstək oldu. Təhsilin keyfiyyətinə daha da ciddi şəkildə nəzarəti gücləndirib. Nöqsanlara yol verən hər bir direktor və müəllimə qarşı ciddi tədbir görülür. Eyni zamanda səmərəli fəaliyyət göstərən pedaqoji işçilərin əməyi də qiymətləndirilir.

- Sumqayıt şəhər İcra hakimiyyətinin başçısı Zakir Fərəcov ilk dəfə şəhərin bütün rəhbər işçilərini, o cümlədən məktəb direktorlarını yığaraq qəti və inamlı tapşırıqlarını verdi. Bildirdi ki, mütləq şəkildə təhsilin keyfiyyət göstəriciləri 70 faizdən çox olmalıdır. Bu sizi qorxutmadı ki?

- Çox gözəl vurğuladınız. Əgər bir rəhbər ki, bu cur inamlı qərar verir, arxamızda dayanırsa, deməli qorxmaq yox daha da məsuliyyətlə çalışmalıyıq.

9 nömrəli məktəbin əvvəlki göstəricilərinə baxanda, düzü narahat olmaya bilməzdim. Əgər maksimal göstərici əvvəllər 26-48 % arasında dəyişibsə, birdən- birə 70% böyük rəqəm idi. Çox şükürlər olsun ki, həmin il keyfiyyət faizimiz 73% oldu. İlk dəfə olaraq 3 şagirdimiz 600-dən yuxarı bal topladı. Cənab başçının etimadını doğrultduq. Məktəbimiz 47 məktəb arasında ilk onluqda yer aldı. Bu tək mənim yox rəhbətlik etdiyim müəllim kollektivin əməyidir.

Onu da qeyd edim ki, çox hörmətli Zakir müəllimin Sumqayıt şəhərinə rəhbər kimi gəlişindən sonra şəhərimiz günü-gündən abadlaşır, dünya şəhərləri sırasında adı çəkilir. Hörmətli Zakir müəllim tərəfindən dövlət tədbirlərində təhsil işçilərinin şəxsən təltif edilməsi hər birimizə stimul verir. Bu gün biz sumqayıtlılar öz əməlimizlə ona borcluyuq və minnətdarıq.

- Məktəbinizdəki daxili nizam-intizam, kollektiv arasındakı münasibət, çətin tərbiyə olunan şagirdlər, diqqətsiz valideynlər, bütun bunlar keyfiyyətin aşağı düşməsinə səbəb yaradırmı?

- Məktəbimizdə 920 şagird, onların təlim-tərbiyəsi ilə 71 müəllim məşğul olur. Müəllim kollektivində daim öz üzərində çalışan müəllimlər çoxdur. 40 sinfimiz var. Hər bir sinfə idarəçiliyi bacaran müəllim təyin olunub və direktor müavinləri, şəxsən özüm daim nəzarət edirik. Elə bir kollektiv olmasın ki, orda neqativ hallar olmasın. Çalışırıq ki, belə hallar olmasın. Bəzən mətbuatda yaxşı işimizə kölgə salmaq istəyənlər də olur. Qədir bilən müəllimlər hər zaman mənim arxamda durublar. Biz haqq yolunda çalışıb xalqın balalarına elm, tərbiyə veririk. Təhsil Naziri cənab Mikayıl Cabbarov, şəhərimizin rəhbəri, cənab Zakir Fərəcov, SŞTŞ-nin müdiri, cənab Nizami Namazov hər zaman bu yolda bizlərə dəstəkdirlər. Qara yaxmaq hər zaman olub və olacaqdır da. Amma biz şəffaf əllərlə işləyirik.

Qaldı ki, çətin tərbiyə olunan şagirdlər və cətin valideynlər, biz həm müəllim, eyni zamanda psixoloquq.

- Məktəbiniz iki korpusdan ibarətdir.Həm də kohnə korpusunuz qəzalı vəziyyətdədir. Bununla yanaşı təmir işləri hansı şəkildə aparılır? Növbəti tədris ili üçün əsaslı təmir nəzərdə tutulurmu?

- Məktəbimiz iki korpusdan,iki növbədən ibarətdir. 2016/2017-ci tədris ilində məktəbimiz 1 saylı Ərazi Maliyyə Hesablama Mərkəzi tərəfindən kosmetik təmir edilib. Cari ildə isə daxili imkanlarımızın köməyi ilə təmir etmişik. Əsaslı təmir işlərinin aparılması ilə bağlı Nazirlər Kabinetinə məlumat verilib. Ümud edirik ki, növbəti tədris ili üçün bizim məktəbimiz də əsaslı təmir olunacaqdır.

- Qış mövsümü yaxınlaşır. Məktəbinizin istilik sistemi yararlı vəziyyətdədirmi?

- Hər il olduğu kimi, bu il də ardıcıl olaraq işlərimizi düzgün qurmuşuq. İstilik sistemləri yoxlanılıb, tam hazır vəziyyətdədir. Qış mövsümü üçün artıq daxili əmr verilib.

- Bəhruz müəllim, 2017/2018-ci tədris ilində hansı planlarınız var?

- 2017/2018-ci tədris ili Azərbaycan Respublikası Təhsil Naziri, cənab Mikayıl Cabbarov "Keyfiyyət ili” elan edib. Bu il hər birimiz üçün çox məsuliyyətli il olacaq. İki on birinci sinfimiz var və onlardan ən yüksək nəticə gözləyirik. Artıq fənn aylıqları bölünüb. Direktor müavinlərinə ciddi tapşırıqlar verilib. Onu da əlavə edim ki, məktəbimizə 10-a yaxın cavan kadr gəlib. Müəllimlərimiz onlara yaxından dəstək olurlar. Düşünürəm ki, birgə naliyyətlərimizlə bu ildə uğur qazanacağıq.

- Qarşıdan 5 Oktyabr Beynəlxalq Müəllimlər günü gəlir. Kollektivinizə nə arzulayardınız?

- Kollektivimizin hər bir üzvünə möhkəm cansağlığı, uzun ömür, ailə xoşbəxtliyi, mehribançılıq və daim əzmlə birgə çalışmaqlarını arzulayıram. Qoy "Keyfiyyət ili”ndə göstəricimiz 80% olsun. Onu da əlavə edim ki, hər il məktəbimizdə 5 Oktyabr Beynəlxalq Müəllimlər günü "Özünüidarəetmə” günü kimi qeyd olunur. Yəni rəhbər və müəllimlər seçilən şagirdlər olurlar.

- Vaxt ayırıb müsahibə verdiyinizə görə sizə öz minnətdarlığımı bildirirəm. Kollektivimizin addından sizi və kollektivinizi qarşıdan gələn Beynəlxalq Müəllimlər günü münasibətilə təbrik edir, ugurlar, dözüm arzulayırıq.

- Sizə də öz minnətdarlığımızi bildiririk ki, reallıqları işıqlandırırsınız.

Vüqar Xəyal (İltifatoğlu)

"Yeganə Yol” qəzetinin məsul katibi,

Azərbaycan Jurnalistlər Birliyinin üzvü,

publisist