Bu
gün bütün dünyada olduğu kimi, Azərbaycanda da Beynəlxalq Müəllimlər Günü kimi qeyd edildi.
9 saylı məktəb bu günü fərqli formatda qeyd edirdi: direktor kürsüsündə şagird əyləşmişdi. Direktor müavinləri vəzifələri də onlara həvalə olunmuşdu. Həmin gün müəllimləri də şagirdlər əvəz edirdi. Artıq bu ənənə bir neçə ildir ki, məktəb rəhbərliyi tərəfindən davam etdirilir.
Fürsətdən istifadə edib məktəbin məktəbin formal direktoru ilə söhbətləşdik.
Müsahibim "Özünüidarəetmə”də məktəb direktoru seçilən 10-cu sinif şagirdi İsmayılzadə Turanə Eldəniz qızıdır. İlk ənənəvi sualım belə oldu.
- İnsan anadan olan gündən arzularla bərabər dünyaya göz açır. İlk arzun nə olub və həyata keçibmi?
- Hər bir uşağın arzusu uşaqlıqdan istəklərini həyata keçirmək olur. Allah valideynlərimə can sağlığı versin ki, mənim xətrimə dəyməyiblər. Məktəb vaxtı da fənn olimpiadalarında iştirak edib layiqli yer qazanmaq olub.
- İlk dəfə 1-ci sinfə qədəm qoyanda hansı hissləri yaşamısan? Müəllim-şagird münasibətlərinə hansı mövqedən yanaşmısan?
- Çox həyəcanlı olmuşam. O cümlədən sevincimin həddi yox idi. Tez bir vaxtda sinif yoldaşlarımla dostlaşıb çətin tapşırıqları birgə həll etmişik. İlk gündən müəllimlə münasibətdə ideal bir varlıq kimi baxmışam.
- Məktəb və müəllimlər haqqında sənin və valideynlərinin fikirləri üst-üstə düşübmü? Yəni heç nədən məktəbin və müəllimlərin ünvanına mənfi fikirlərin olması baxımından valideylərin və sənin münasibətin necə olub?
- Bir dəfə müəlliməm mənə qarşı acıqlı olub danlamışdı. Əlbətdə, taqsır özümdə olsa da, valideynlərimə bildirmişdim. Valideylərimdən ona qarşı təziq əvəzinə məni danlamaqları oldu. Amma nə yaxşı ki, danlanıldım.
- Heç fikirləşərdin ki, nə vaxtsa təhsil aldığın məktəbdə belə bir "Özünüidarəetmə” günü qeyd olunsun və sən məktəbin direktoru təyin olunasan?
- Yox inanın heç fikirləşməzdim. Mənim üçün olduqca böyük bir hadisə oldu. 920 uşaq arasında bir gün də olsa, direktor seçilməyim bəlkə də gələcək arzularıma qanad verdi.
- Ailənizdə müəllim peşəsində çalışan olubmu və hal-hazırda varmı? Müəllim peşəsini seçmək arzusunda olmusanmı? Olubsa bu həvəs kimdən yaranıb?
- Babam Araz müəllim əvvəllər Sumqayıt şəhər Təhsil Şöbəsinin müdiri, sonralar isə 16 nömrəli məktəbdə direktor vəzifəsində çalışıb. Atamın xalaları müəllimədirlər. Amma mənim arzum həkim olmaqdır.
- Bu gün direktor vəzifəsini daşımaqla bu peşənin nə dərəcədə şərəfli və məsuliyyətlii olduğunu dərk etdinmi? Müasir təhsilimizdə istər sinfin, istərsə də məktəbin idarə olunması baxımından nə qədər çətin olmasının şahidi oldun. Bu baxımından şagirdlərə və valideynlərə hansı tövsiyələri verərdin?
- Kənarda çoxlarına hər şey asan görünür. Əslində bu elə də asan deyilmiş. Bəlkə də biz şagirdlər dərindən dərk etməsək də, gərək valideynlər də bizə məktəbə, müəllimlərə qarşı sevgi nümayiş etdirsinlər. Məktəb şəxsən mənim üçün müqəddəs ocaqdır. Valideynlərə və şagirdlərə tövsiyəm budur ki, müəllimlərin qədrini bilsinlər. Zəhmətlərini heçə endirməsinlər. Gələcəkdə açıq tipli sualların çoxalmasının tərəfdarı deyiləm.
- Müəllimlərinə şagirdlər adından nə arzulayırsan?
- Belə bir bayram günündə başda məktəbin direktoru Bəhruz müəllim olmaqla bütün müəllim kollektivini şagird kollektivimizin adından təbrik edirik. Qoy məktəbimizin bundan sonra da uğurları daha da çox olsun.
Vüqar Xəyal (İltifatoğlu)
"Yeganə Yol” qəzetinin məsul katibi,
Azərbaycan Jurnalistlər Birliyinin üzvü
Xəbərdən istifadə edərkən istinad etmək vacibdir.
