Xeberle.com-a verilən məlumata görə, Qubadlı rayonunun Təhsil şöbəsinin akt zalında keçirilən yolasalma tədbirində Qubadlı rayon İcra Hakimiyyəti başçısının müavinləri Allahverdi Haqverdiyev və Xoşqədəm Alıyeva, rayonun idarə və müəssisə rəhbərləri, məktəb direktorları, tur aksiyada iştirak edən şagirdlər və onların valideynləri iştirak edirdilər.

Tədbiri giriş sözü ilə açan Qubadlı rayon İcra Hakimiyyəti başçısının müavini Xoşqədəm Alıyeva 9 noyabr Bayraq Günü münasibəti ilə tədbir iştirakşılarını təbrik edərək, Qubadlı əhalisinin Bayrağımıza, Dövlətimizə, Prezidentə sədaqətli olmağını bildirib.

Xoşqədəm Alıyeva Azərbaycan Respublikasının Prezidenti İlham Əliyevin və Birinci vitse-prezident Mehriban Əliyevanın təhsilin, səhiyyənin, mədəniyyətin, idmanın inkişafına, ekologiyanın qorunmasına diqqəti, hər il ölkə vətəndaşlarının pulsuz müayinəyə cəlb olunması, şəhid və əlil ailələrinə, qaçqın və məcburi köçkünlərə, aztəminatlı ailələrə, internat və qocalar evlərində yaşayanlara dövlət qayğısından danışıb.

Sonra qeyd edilib ki, dövlət gənclər siyasətinin ən mühüm istiqamətlərindən biri gənc nəslin Vətənə, tariximizə, mədəniyyətimizə, milli adət-ənənələrimizə hörmət və məhəbbət ruhunda tərbiyə edilməsidir. Bununla əlaqədar olaraq, Azərbaycan Respublikasının Prezidenti cənab İlham Əliyevin tapşırığına əsasən orta məktəblərdə 9-11-ci sinflərdə təhsil alan şagirdlər üçün "Ölkəmizi tanıyaq” tur-aksiyası 4 il ərzində 7 istiqamət üzrə 7 tur-aksiya təşkil edilib, ölkəmizin bütün bölgələrinin əhatə olunduğu bu tur-aksiyalarda ümumilikdə 13 min 648 məktəblinin iştirak edib. Noyabr ayının 11-14 və 16-19 tarixlərini əhatə edəcək 8-ci tur-aksiyada isə 4 istiqamət üzrə 76 şəhər və rayondan 3213 nəfər məktəbli iştirak edir və bununla da, iştirakçıların sayının 17 minə çatıb. Keçirilən tur-aksiyalarda rayonumuzun 100-dən artıq məktəbliləri iştirak edib. Bu tur aksiyada isə rayonumuzun məktəbliləri 11-14 noyabr tarixində Quba-Qusar-Xaçmaz rayonları istiqamətində ekskursiyada olacaqlar.

Sonra Allahverdi Haqverdiyev qeyd edib ki, bu il sentyabrın 14-də Bakıda ölkəmiz üçün tarixi əhəmiyyətli bir hadisə baş verib. Bəlkə də bir çoxları üçün gözlənilməz olan bu hadisənin, əslində, dərin kökləri vardır. 1994-cü ildə Ulu öndər Heydər Əliyevin siyasi uzaqgörənliyi, qətiyyəti və əzmkarlığı sayəsində "Əsrin müqaviləsi" imzalandı. Bununla Azərbaycan hökuməti ilə BP başda olmaqla dünyanın böyük enerji şirkətləri arasında uzunmüddətli əməkdaşlığın təməli qoyulub. Keçən müddət ərzində əldə edilən təcrübə təsdiqləyir ki, tərəflər bir-birinə etibar edir və əməkdaşlığı davam etdirməkdə qərarlıdırlar. Həmin səbəbdən, imzalanan yeni saziş Azərbaycanın geosiyasi nüfuzunun yüksəlməsi, müstəqil dövlət quruculuğu prosesinin uğurla inkişaf etdirilməsi baxımından olduqca qiymətlidir. Azərbaycan 6 ölkənin 11 şirkəti ilə 2050-ci ilə qədər "Azəri", "Çıraq" və "Günəşli" yataqlarının dərinlikdə yerləşən hissəsinin birgə işlənməsi və neft hasilatının pay bölgüsü haqqında düzəliş edilib yenidən işlənmiş saziş imzalayıb.

Bu da onu sübut edir ki, Ulu öndər Heydər Əliyevin müəyyənləşdirdiyi bu siyasət hazırda Azərbaycan Respublikasının Prezidenti cənab İlham Əliyev tərəfindən uğurla davam etdirilir.

Natiq çıxışında 2016-cı ilin aprel döyüşlərində əldə olunmuş uğurlar, "Böyük Qayıdışın” ilk müjdəsi olan Cocuq Mərcanlı kəndinin yenidən qurulması, ölkəmizdə siyasi-sabitliyin qorunub saxlanması, Azərbaycanın dünyəvi, tolerant, multikultural dövlət olması, gənclərin dini-xurafata meyllənməməsi, onların intellektual səviyyəsinin yüksəldilməsi, beynəlxalq aləmdə, xüsusən də şərq ölkələrində baş verən münaqişələr barədə məlumat verib.

Daha sonra tur iştirakçıları, onların valideynləri və digərləri çıxış edərək Azərbaycan Respublikası Prezidenti İlham Əliyevin təşəbbüsü ilə keçirilən "Ölkəmizi tanıyaq” layihəsini dəstəklədiklərini və yaradılan bu şəraitə görə dövlətimizin başçısına minnətdarlıqların bildiriblər.

Qeyd ediblər ki, bu aksiyanın gənclərin vətənpərvərlik, tarixi –mədəni irsimizə hörmət ruhunda tərbiyyə olunmasına, məktəblilərin dünyagörüşlərinin daha da zənginləşməsinə xidmət göstərir.

Bu gün məktəblilər Ümummilli lider Heydər Əliyevin büstü önünə gül dəstələri qoyublar və Quba-Qusar-Xaçmaz rayonu istiqamətində ekskursiyaya yola düşüblər.