Bu il
Sumqayıt şəhərindəki orta məktəblərdə "Sağlam təhsil-sağlam millət” layihəsi çərçivəsində
yaradılan "Sağlam təhsil” siniflərinin sayı artırılıb.
Sumqayıt şəhər Təhsil ŞöbəsindənXeberle.com-un sorğusuna cavab olaraq bildirilib ki, "Sağlam təhsil-sağlam millət" layihəsi
Sumqayıt şəhərində ilk dəfə 2014-cü ildə 31 nömrəli tam orta məktəbdə həyata
keçirilib. Layihənin tətbiqinə həmin il 2 sinifdə 48 şagirdlə başlanılıb və hər
il 2 sinif artırılaraq hazırda 8 sinifə çatdırılıb. Ötən tədris ilində
"Sağlam təhsil-sağlam millət" layihəsi üzrə 6 sinifdə 144 şagird təhsil
alırdısa, hazırda layihə çərçivəsində 8 sinifdə 192 şagird təhsil alır.
Qeyd edək
ki, hazırda Bakı və Sumqayıt şəhərlərində yerləşən 38 orta təhsil müəssisəsində
168 "Sağlam təhsil” sinfi fəaliyyət göstərir və 3748 şagird bu layihədə iştirak
edir.
Məlumat üçün bildirək ki, "Sağlam təhsil
sinfi”ndə tədris hərəkətdə təlim şəraitində həyata keçirilir. Şagird masaları həm
qismən oturaraq, həm də ayaqüstü çalışmaq imkanı yaradır. Bu masaları hazırda
istifadə edilən məktəb masalarından fərqləndirən ən mühüm cəhət onların səthinin
nisbətən maili olmasıdır. Belə maillilik şagirdin vizual dərketməsi baxımından
xüsusi əhəmiyyət kəsb edir. Sinif otaqlarındakı digər avadanlıqlar da layihəyə
uyğun hazırlanaraq yerləşdirilib. Prezidentin sərəncamı ilə təsdiq edilmiş "Azərbaycan
Respublikasında təhsilin inkişafı üzrə Dövlət Strategiyası”nda nəzərdə tutulan
vəzifələrin icrasına nail olunmasında şagirdlərin psixi-fiziki və mənəvi
sağlamlıq vəziyyəti müstəsna əhəmiyyət daşıyır. Müvafiq sənədə əsasən Təhsil
Nazirliyi tərəfindən təhsilalanların sağlamlığının qorunması və təlim nailiyyətlərinin
yüksəldilməsi sahəsində təhsil texnologiyalarının tətbiqi üzrə işçi qrup yaradılıb.
Təhsil Nazirliyi bu istiqamətdə Səhiyyə Nazirliyi və Milli Təhsil
Texnologiyaları Mərkəzi qeyri-hökumət təşkilatı ilə birgə "Sağlam təhsil-sağlam
millət” layihəsi çərçivəsində əhəmiyyətli işlər həyata keçirib.
Elnarə
Salamova
Xeberle.com
Xəbərdən istifadə edərkən istinad etmək vacibdir.
