Azərbaycan məktəblərində şagirdlərin tətilə yanaşma tərzi dünya təhsil təcrübəsinə uyğun deyil.
Bu sözləri Axar.az-a təhsil eksperti Kamran Əsədov bayram günlərində müəllimlərin şagirdlərə həddən artıq tapşırıq verməsi ilə bağlı danışarkən deyib. Onun sözlərinə görə, şagirdlərin istirahət hüququ daha çox ibtidadi siniflərdə ciddi şəkildə pozulur:
"Bu o demək deyil ki, şagirdlərə ev tapşırığı vermək lazım deyil. Bunu edərkən müəllimlər nəzə almalıdır ki, şagirdlər onsuz da bütün tədris ili ərzində ev tapşırığı edirlər. Ağır proqram onları həm fiziki, həm də zehni yora bilər. Ona görə də istər qış, istər yaz, istərsə də yay tətilləri vaxtı şagirdlərə çətin ev tapşırıqları vermək lazım deyil”.
K.Əsədov hesab edir ki, bütün fənlərdən şagirdlərə ev tapşırığı verməyə ehtiyac yoxdur. Onun fikrincə, bunun o qədər də effekti olmayacaq:
"Daha çox şagirdlərə ev tapşırığı verərkən fərdi yanaşmaya üstünlük vermək, şagirdin nəticələrə zəif olduğu fənlərə, mövzulara üstünlük vermək lazımdır.
Təəssüf ki, bəzi hallarda tətil vaxtı ev tapşırığı verən müəllimlər tətildən sonra onları yoxlamırlar ki, bu da yaxşı hal deyil.
Hesab edirəm ki, tətil vaxtı 4-5-ci siniflərdə ev tapşırığına 2 saatdan, 6-8-ci siniflərdə 2.5 saatdan, yuxarı siniflərdə isə 3.5 saatdan artıq ayırmaq lazım deyil”.
Şagirdin ev tapşırıqlarını yerinə yetirmə dərəcəsini onun savadının, təhsildə uğur qazanmasının göstəricisi olmadığını deyən ekspert mühüm statistikaya toxunub:
"Bir sıra araşdırma nəticəsində məlum olub ki, hər axşam evdə iki-üç saat ev tapşırığı edən şagirdlər imtahanlarda heç ev tapşırığı etməyən şagirdlərə nisbətən 10 dəfə daha yaxşı nəticə göstərirlər.
Dünya təcrübəsində tətil vaxtı ev tapşırıqlarına münasibət fərqlidir. Məsələn, tətil dövründə ev tapşırıqları Finlandiya məktəblərində Britaniyada məktəblərindəkindən daha azdır. Üstəlik, əlavə özəl hazırlıq anlayışı da yoxdur.
Finlandiyalı şagirdlər məktəbdə az vaxt keçirirlər, daha az ev tapşırığı yerinə yetirirlər, ancaq yenə də dünyada ən yaxşı nəticələrdən birini göstərirlər.
Ev tapşırığı finlərə lazım olmasa da, aparılan tədqiqatlar onun müsbət fərq yaratdığnı göstərir. Tətil axtı ibtidai sinif şagirdlərinə isə ümumiyyətlə ev tapşırığı vermək yaxşı hal deyil.
Tətil müddətində şagirdlərə hoppanmaq, qaçmaq, barmaqların gimnastikası, kəndlərə, meşə və zooparklara gəzinti kimi fəaliyyət növlərinə üstünlük verilsin”.

Xəbərdən istifadə edərkən istinad etmək vacibdir.