"Abituriyent 4 jurnalında kifayət qədər texniki səhvlər var. Mən sadəcə birini açıqladım ki, bu abituriyent jurnalının 34-cü səhifəsində riyaziyyat fənni üzrədir. Eyni zamanda mənə müraciətlər olunur ki, DİM-ə tez-tez şikayət etsək də, şikayətlərimizə baxılmır. Təəssüflər olsun ki, DİM son zamanlar qabiliyyət imtahanları ilə bağlı olan şikayətlərə də baxmır”.

Xeberle.com Bizimyol.info-ya istinadla xəbər verir ki, bu sözləri təhsil eksperti Kamran Əsədov son günlər abituriyentlərin qarşılaşdığı problemləri şərh edərkən deyib.

 

O qeyd edib ki, təhsillə bağlılığı olan qurumlar öz işlərinə məsuliyyətsiz və laqeyid yanaşırlar:
"Dövlət İmtahan Mərkəzi hər il Abituriyent jurnalını nəşr edir. Burada həmin il üçün ali məktəblərə qəbul imtahanlarından sonra keçid balını toplaya bilən abituriyentlərin seçə biləcəyi ixtisaslar, ixtisasların kodları, hansı universitetdə hansı ixtisaslar üzrə kadr hazırlığının həyata keçirilməsi, oradakı dövlət sifarişli yerlərin miqdarı qeyd olunur. Abituriyent 4 jurnalında kifayət qədər texniki səhvlər var. Mən sadəcə birini açıqladım ki, bu abituriyent jurnalının 34-cü səhifəsində riyaziyyat fənni üzrədir. Orada göstərilib ki, riyaziyyat fənni üzrə 75 dövlət sifarişli, yəni pulsuz yer var. Bu 75 yer BDU, SDU, MDU-nun Bakı filialı və Azərbaycan universitetləri arasında bölünür. Həmin səhifədə göstərilir ki, Azərbaycan universitetində riyaziyyat ixtisası üzrə kadr hazırlığı aparılır. Ancaq səhifə 17-də Azərbaycan universitetində olan ixtisaslar arasında riyaziyyat ixtisası üzrə qəbulun aparılmadığı görünür. Orada qeyd olunub ki, Azərbayacan universitetində 1-ci ixtisas qrupu üzrə yalnız kompüter mühəndisliyi ixtisası üzrə qəbul aparılır. Əvvəllər belə bir qayda var idi ki, özəl universitetlərdə pulsuz təhsil yoxdur, lakin indi elə deyil. Dövlət sifarişli ixtisaslar verilir, ən yüksək bal toplayan abituriyentlər universitetdən asılı olmayaraq hansı universiteti istəsələr seçə bilirlər. Qeyd edim ki, 3-cü qrupda dövlət sifarişli ixtisaslar var ki, səhifə 36-da Qərb universitetinin adı verilməyib. Azərbaycan dili və ədəbiyyat müəllimi hazırlayan universitetlərin siyahısında da həmin universitetinin adı verilməyib, halbuki Qərb universitetində Azərbaycan dili və Ədəbiyyat müəllimliyi ixtisası üzrə kadr hazırlığı mövcuddur. Belə bir qeyd də var ki, əgər ixtisasın qarşısında YÖ yazılarsa, bu yalnız ödənişli deməkdir və bu o anlama gəlir ki, orada heç bir halda dövlət sifarişli ixtisas ola bilməz. Bu siyahıya ADA, Xəzər universitetləri daxildir. YDS isə yalnız dövlət sifarişli deməkdir. Qərb universiteti ilə bağlı qeyddə göstərilir ki, yalnız dövlət sifarişli yerlər olmalıdır, lakin 36-cı səhifədə ixtisasın dövlət sifarişli olub olmaması ilə bağlı heç bir qeyd yoxdur.

Bu kimi hallar tez-tez olur. Məsələn, keçən il 5-ci qrupun ixtisası 4-cü qrup ixtisasının yerində yazılmışdı, yəni Bədən tərbiyəsi ixtisasına qəbul 4-cü qrupda aparılsa da, onun dövlət sifarişli yeri 5-ci qrupda verilmişdi. Abituriyentlər düşünürdülər ki, həmin ixtisasa dövlət sifarişli qəbul yoxdur. DİM-in istər test tapşırıqlarında, istərsə də çap etdiyi jurnalları, test banklarında zaman-zaman müxtəlif qüsurlar ortaya çıxır. Bu da korrektə və redaktə işinin yüksək səviyyədə aparılmadığını göstərir. Mən elektron xidmətlərin fəaliyyətini çox yaxından izləyirəm, eyni zamanda Azərbaycanda fəaliyyət göstərən bütün təhsil qurumlarının fəaliyyətini yaxından izləyirəm. Hətta bir neçə gün öncə elektron ərizənin tarixi səhv qeyd olunduğu üçün də müəyyən problemlər yaranmışdı.

Deməzdim ki, onlar bunu qəsdən edirlər. Amma son vaxtlar öz işlərinə olduqca məsuliyyətsiz və laqeyd yanaşırlar. Mənə müraciətlər olunur ki, DİM-ə tez-tez şikayət etsək də, şikayətlərimizə baxılmır. Təəssüflər olsun ki, DİM son zamanlar qabiliyyət imtahanları ilə bağlı olan şikayətlərə də baxmır”.