"Sumqayıt şəhəri üzrə təhsil şöbəsinin tabeliyindəki məktəblərdə dövlət vəsaiti hesabına məktəbəhazırlıq qrupları təşkil edilir. Şəhərdə fəaliyyət göstərən lisey və gimnaziyaları çıxmaq şərti ilə bütün orta ümumtəhsil ocaqlarında 150 qrupun təşkili nəzərdə tutulub."
Bu barədə Xeberle.com-a açıqlamasında Sumqayıt şəhər Təhsil Şöbəsinin əməkdaşı Oqtay Nuriyev məlumat verib. O.Nuriyev lisey və gimnaziyalarda məktəbəhazırlıq qruplarının təşkil edilməməsinin səbəblərini də açıqlayıb: "Həmin təhsil müsəssisələrində boş sinif otaqlarının olmaması və müəllimlərin dərs saatlarının çoxluğu məktəbhazırlıq qruplarının yaradılmasına imkan vermir".
Məlumat üçün bildirək ki, söhbət "Təfəkkür", "İstedad" Nizami
Gəncəvi adına Texniki və Təbiət Elmləri liseylərindən və Təbiət Elmləri Təmayüllü Gimnaziyadan gedir.
Qeyd edək ki, həftədə 4 gün fəaliyyət göstərən məktəbəhazırlıq qruplarının əsas məqsədi uşaqların tədrisə hazırlıqlı başlaması, dərs prosesinə öncədən alışması və onlarda müəyyən bilik, bacarıq vərdişlərin formalaşdırılmasıdır. Təhsilə atılan ilk addım kimi mühüm xarakter daşıyan məktəbəhazırlıq qruplarında məşğələlər yalnız ibtidai sinif müəllimi ixtisaslı, bacarıqlı, intellektual və müəyyən iş təcrübəsinə malik müəllim tərəfindən aparılır.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
