Xeberle.com xəbər verir ki, Təhsil eksperti Kamran Əsədov Axar.az-a açıqlamasında vahid tələbə biletinin üstünlüklərindən danışıb. O bildirib ki, dünya ölkələrində olduğu kimi, bu təcrübədən bizdə də istifadə etmək lazımdır:
"Tələbə bileti həmin şəxsin hüquqi sənədidir. Amma təəssüf ki, ölkəmizdə təhsil alan tələbələrin aldıqları tələbə biletləri bu funksiyanı yerinə yetirmir. Dünya ölkələrində, hətta qardaş Türkiyədə təhsil alan tələbələr bu biletlərlə bir çox əməliyyatları yerinə yetirə bilir, hətta nəqliyyatda da istifadə edə bilirlər.
İstər ali, istərsə də orta ixtisas təhsili müəssisələrinə qəbul olan tələbələrə vahid dizaynda olan tələbə bileti verilməlidir. Bu vəsiqələri alan tələbələr ondan hüquqi sənəd kimi də istifadə etməli, nəqliyyatda ödəniş imkanları da olmalıdır. Hazırda dünya ölkələrində çoxfunksiyalı plastik kartlar mövcuddur. Bu onu daşıyanların da işini rahatladır”.
Ekspertin sözlərinə görə, vahid sistemə qoşulmuş rəqəmsal tələbə bileti onu daşıyana nəzarət etməyə imkan verəcək:
"Belə ki, tələbənin hansı ərazilərdə olduğu, nəyə pul xərclədiyi açıq şəkildə sistemdə görünəcək. Bundan başqa, vahid tələbə bileti kütləvi kitabxanalardan da istifadəyə imkan verməlidir.
Hesab edirəm ki, vahid elektron-rəqəmsal tələbə biletinə keçdikdən sonra tələbələrə istər nəqliyyatda, istər xidmət və digər sahələrdə endirimlər tətbiq etmək olar.
Nəzərə alaq ki, bu gün 54 universitetdə 170 minə yaxın, 50-yə yaxın orta ixtisas təhsili müəssisələrində 40 mindən çox, peşə təhsili müəssisələrində 20 mindən çox tələbə təhsil alır və vahid tələbə biletinə keçmək böyük əhatə dairəsini özündə cəmləşdirəcək”.

Xəbərdən istifadə edərkən istinad etmək vacibdir.