Azərbaycan torpağı, xalqı min illər boyu öz suverənliyini, müstəqilliyini, birliyini qoruyub saxlamaq üçün mübarizə aparmış, bu gün də bu mübarizəmiz davam edir. Sentyabrın 27-dən başlayaraq torpaqlarımızın düşmən işğalından azad edilməsi, birliyimizin, bütövlüyümüzün bərpası uğrunda gedən "Vətən müharibəsi”ndə əsgərlərimiz ön cəbhədə, uşağından tutmuş yaşlısına qədər hər birimiz arxa cəbhədə bir olaraq qələbə üçün kökləndik.
Döyüşlərdə iştirak edən hərbi qulluqçuların, əsgərlərin döyüş əzminin daha da artırılması, göstərdikləri möhkəm iradəyə görə minnətdarlığımızı, var gücümüzlə dəstək olduğumuzu bildirmək, onlarda ruh yüksəkliyini daha da artırmaq üçün təbliğat və təşviqat tədbirləri davam etdirilir. Bu tədbirlər çərçivəsində "Əsgərə məktub” layihəsi böyük coşqu, sevinc ilə davam edir.
Rayonumuzun ümumi təhsil müəssisələrinin şagirdlərinin torpaqlarımızın bütövlüyü uğrunda qanlarından, canlarından keçən əsgərlərə ünvanladıqları məktublar şəxsi heyətdə xoş təəssürat yaradır, onlar tərəfindən sevinclə qarşılanır. Müharibə şəraitində yeniyetmələrin, şagirdlərin ordumuza sevgisi təqdirəlayiqdir. Onlar tanımadıqları əsgərlərə öz istək və arzularını çatdırır. İstək və arzuların məzmunu isə birdir: torpaqlarımız işğaldan azad edilsin. Hər məktub bir şagirdin kağıza tökülən ürək sözləri, ordumuzun əsgərinə ünvanlanan səmimi müraciətidir. Şagirdlərimizin yazdıqları məktubların içərisinə valideynlərinin onlar üçün verdiyi 1-2 manatlıq cib xərcliyini qoyması o kiçik əllərə sahib gələcəyimizin mərd oğul və qızlarının nə qədər böyük ürəyə sahib olduqlarını göstərir.
Məktəblilərimizin əsgərlərə ünvanladıqları məktublarda köçkün rayonun şagirdləri olaraq işğal altında olan doğma ata-baba yurdlarına, kökünə bağlılıq, vətən sevgisi, vətən torpağının müqəddəs olması diqqəti çəkir. Biz bu məktublarla tanış olarkən Azərbaycanın gələcəyinin də əmin əllərdə olduğuna bir daha inandıq. Bu torpaq hamımızındır, müdafiəsində durmaq, qorumaq da hər birimizin müqəddəs borcudur. Məktublar çox, Azərbaycana, vətənə sevgi isə bitib tükənmir.
Bu məktublar vətən keşiyində dayanan əsgərlərimizdə ruh yüksəkliyi yaradır, onlara mənəvi dayaq olur. Arxasında bütün Azərbaycan xalqını bir olmuş görən əsgər daha əzmlə, daha istəklə, arzuyla vuruşur, qələbəyə daha inamlı addımlarla irəliləyir. Bu inamın, gücün nəticəsidir ki, 30 ildən sonra artıq bu gün torpaqlarımızın bütövlüyü bərpa olundu, Cənab Prezident İlham Əliyevin dediyi kimi " Qarabağ Azərbaycandır!” ifadəsi öz təsdiqini tapdı. Elə bu gündən "Əsgərə məktub” layihəsinin məzmunu da dəyişmiş oldu, elə ən sevindirici hal da bundan ibarətdir.
Xəbərdən istifadə edərkən istinad etmək vacibdir.
