Sumqayıtda təhsil müəssisələrində əyani tədris prosesinin təşkili ilə bağlı monitorinqlər keçirilir.
Xeberle.com xəbər verir ki, həyata keçirilən monitorinqlər zamanı tədris müəssisələrində pandemiya ilə bağlı tətbiq olunan qaydaların vəziyyəti yoxlanılır.
Növbəti belə monitorinq 9 nömrəli tam orta məktəbdə aparılıb. Sumqayıt şəhər Təhsil Şöbəsinin müdiri Arzu Alızadə və müdir müavini Ramin Abasov tədris prosesi ilə tanış olublar.
A. Alızadə ibtidai siniflərdə və məktəbəhazırlıq qrupları üzrə ənənəvi qaydada tədrisin təşkilinin vəziyyəti ilə maraqlanıb, dərs prosesinin gedişini izləyib.
Qeyd edək ki, fevralın 15-dən Sumqayıt şəhər Təhsil Şöbəsinin tabeliyindəki ümumi təhsil müəssisələrində ümumi orta təhsil səviyyəsində (V-IX siniflərdə) və xüsusi məktəblərdə (I-IX siniflərdə) əyani tədrisə start verilməsi nəzərdə tutulur.
Xatırladaq ki, fevralın 1-dən Sumqayıt şəhər Təhsil Şöbəsinin tabeliyindəki ümumi təhsil müəssisələrində ibtidai siniflər və məktəbəhazırlıq qrupları üzrə ənənəvi təhsilə start verilib. Sumqayıtda ibtidai siniflərdə əyani təhsil həftədə 3 dəfə, məktəbəhazırlıq qruplarda isə həftədə 2 dəfə təşkil olunur.
Xəbərdən istifadə edərkən istinad etmək vacibdir.
