Beynəlxalq əlaqələrini ildən-ilə genişləndirən Sumqayıt Dövlət Universiteti bu gün ölkəmizin dünyaya inteqrasiyasında önəmli rol oynayır. Universitet Türkiyə, İran, ABŞ, Rusiya, İngiltərə, Almaniya, Avstriya, İsveç, Litva, Macarıstan, İspaniya, Polşa, Ukrayna, İsrail, Tacikistan, Qazaxıstan və s. ölkələrin ali təhsil müəssisələri ilə iki və çoxtərəfli müqavilələr və beynəlxalq layihələr çərçivəsində əməkdaşlıq həyata keçirir. Xəzəryanı Dövlət Universitetləri Assosiasiyasının üzvü, Azərbaycan-Rusiya Ali Təhsil Müəssisələri Assosiasiyasının həmsədridir.
Bu uğurlar fonunda Fevralın 24-də Kimya və biologiya fakültəsinin "Neft kimyası və kimya mühəndisliyi kafedrası”nın müdiri, professor Əkbər Ağayev Rusiya Federasiyası Şimali Qafqaz Federal Universitetin Texnologiya İnstitutunun kimya texnologiyası ixtisası üzrə təhsil alan III kurs tələbələrinə "Katalitik proseslər” mövzusunda onlayn mühazirə oxudu. Professorun ümumi kimya texnologiyası fənninin bir fəsli olan, elm və texnikanın bu sahədə son və müasir nailiyyətlərini özündə cəmləşdirən mühazirəsi tələbələrin böyük marağına səbəb olmuşdur.Onlayn rejimdə keçirilən tədbirdə əlaqələrin gələcəkdə daha da genişləndirilməsi, digər sahələrdə də məharət dərslərinin davam etdirilməsininin vacibliyi vurğulandı.
Xəbərdən istifadə edərkən istinad etmək vacibdir.
