Bu gün - 13 sentyabr tarixindən Sumqayıt Dünya məktəbində yeni tədris ilinə start verilib. Bu münasibətlə məktəbin həyətində müəllim şagird kollektivi, valideynlər, həmçinin digər qonaqların iştirakı ilə tədbir təşkil olunub. Azərbaycanın  Dövlət Himni səsləndirildikdən sonra məktəbliləri və qonaqları salamlayıb, çıxış üçün sözü Dünya məktəbinin təsisçisi, Xəzər Universitetinin rektoru Hamlet İsaxanlıya veriblər. H.İsaxanlı məktəbin yaranması tarixindən danışaraq birincilərə uğurlar diləyib. O, həmçininin Azərbaycan üzrə fəaliyyət göstərən Dünya məktəbləri tərəfindən şəhid və qazi övladlarının ödənişsiz təhsili üçün xüsusi kvota ayrılması və onların bütün xərclərinin qarşılanması barədə söz açıb.

Bunda sonra tədbir musiqili-bədii proqramla davam edib.

Tədbirin yekununda birincilər ilk zəngin sədaları altında məktəbə daxil olublar.

Qeyd edək ki, Dünya məktəbi 1998-ci ildən Xəzər Universitetinin tərkibində fəaliyyətə başlayıb. Hazırda Bakı, Gəncə və Sumqayıtda fəaliyyətini davam etdirir. Dərslər 3 dildə olmaqla - Azərbaycan, rus və ingilis - tədris olunur.