Sumqayıtda bir məktəbdə şagird özbaşınalığının olduğu iddia edilir.
Bu barədə iddialar sosial şəbəkələrdə yayılıb. Məlumata görə, hadisə Sumqayıt şəhərindəki 24 saylı məktəbdə qeydə alınıb.
Belə ki, ötən gün həmin məktəbin yuxarı sinif şagirdləri aşağı sinifdə təhsil alan azyaşlıları məktəbin ayaqyolusuna salaraq, qapısını bağlayıb və içəridə saxlayıblar.
Daxili İşlər Nazirliyinin mətbuat xidmətindən verilən məlumata görə, hadisə ilə əlaqədar polis əməkdaşları məktəbə cəlb olunublar. Hazırda araşdırmalara başlanılıb.
Məsələ ilə bağlı Abşeron-Xızı regional Təhsil İdarəsindən Xeberle.com-a açıqlama verilib. Bildirilib ki, sosial şəbəkədə Sumqayıt şəhər 24 nömrəli məktəbdə aşağı sinif şagirdinin bullinqə məruz qalması ilə bağlı məlumat paylaşılıb: "Məsələ ilə bağlı Abşeron-Xızı Regional Təhsil İdarəsinin əməkdaşları Sumqayıt şəhər Polis idarəsinin 1-ci Polis bölməsinin yetkinlik yaşına çatmayan uşaqlarla iş üzrə şöbəsinin inspektoru və eyni zamanda psixoloqla birgə məktəbdə olub, uşaqlarla zəruri söhbət aparılıb, müvafiq dəstəkləyici tədbirlərin həyata keçirilməsi qərara alınıb.
Məsələ ilə bağlı müvafiq araşdırma davam edir, hələlik fakt öz təstiqini tapmayıb.
Qeyd edək ki, mütəmadi olaraq məktəbdaxili münasibətlərin düzgün tənzimlənməsi hər zaman diqqət mərkəzində saxlanılır və bununla bağlı zəruri maarifləndirmə işləri görülür.
Xəbərdən istifadə edərkən istinad etmək vacibdir.
