Azərbaycan Respublikası Elm və Təhsil Nazirliyi Təhsildə İnkişaf və İnnovasiyalar üzrə VI qrant müsabiqəsində qalib olan, Nazirliyin maliyyə, şəhər Gənclər və İdman Baş İdarəsi və Abşeron-Xızı Regional Təhsil İdarəsinin təşkilati dəstəyi ilə icra olunan "Şagird Diksiya Klubu” layihəsi çərçivəsində 22, 25, 29 oktyabr 2022-ci il tarixlərində Sumqayıt Heydər Əliyev Mərkəzində şagirdlər üçün interaktiv seminarlar və praktiki məşğələ keçirilmişdir.
Seminarlarda şagirdlər düzgün nitq qabiliyyətini inkişaf etdirmək, qeyri-verbal ünsiyyət vasitələri və natiqlik sənəti, aydın və səlis ünsiyyət qurma, fikir çatdırma vərdişlərinin formalaşdırılması istiqamətində maarifləndirilmişdir.
Seminarlarda gənc natiq Əli Miriyev tərəfindən nitq mədəniyyətinin önəmi, ifadəlilik bacarığı, aydın tələffüs üsulları haqqında elektron təqdimat materialları nümayiş etdirilmişdir.
Sonda şagirdləri maraqlandıran suallar cavablandırılmışdır.
Qeyd edək ki, 5 qrup və hər birində 20 nəfər olmaqla ümumilikdə 100 nəfər şagirdin cəlb olunması nəzərdə tutulan "Şagird Diksiya Klubu”nun növbəti seminarları haqqında layihənin sosial şəbəkə səhifəsində mütəmadi olaraq məlumat veriləcəkdir.
Xəbərdən istifadə edərkən istinad etmək vacibdir.
