Mövzu ilə əlaqədar Elm və Təhsil Nazirliyindən Xeberle.com-un sorğusuna cavab olaraq bildirilib ki, dərslikdən əlavə, materialların heç birinə Nazirlik cavabdeh deyil. Bütün ehtiyacı dərslik ödəyir, valideyn əlavə material alırsa, buna Nazirlik cavabdeh deyil. Bunu nizamlamaq mümkün deyil.

Qeyd edək ki, şagirdlərin dərslikdən əlavə ev tapşırıqları ilə yüklənməsi onların asudə vaxtının düzgün təşkilinə də mane olur. Bundan əlavə, hazırda məktəblilərin çox hissəsinin dərsdən sonra həm də repetitora müraciət etməsi onların dərs yükünü daha da artırır. Keyfiyyətli təhsil adı ilə şagirdləri ifrat dərəcədə yükləməklə təhsilin keyfiyyətini artırmaq olmaz.

Mövcud problemə münasibət bildirən təhsil eksperti Kamran Əsədov istifadə olunan əlavə vəsaitlərin heç birinin Elm və Təhsil Nazirliyi tərəfindən təsdiq olunmadığını qeyd edir. Özəl şəxslər, özəl şirkətlər bu tipli kitabları dərc edirlər, çox təəssüf ki, buna bir nəzarət mexanizmi yoxdur. Əlavə resurslarda istifadə olunan test tapşırıqları və çalışmalar şagirdlərin yaş həddinə və psixologiyasına uyğun olmur. Bir çox hallarda müəllif hər hansı bir kurikulum standartlarına və ya dövlətin əsas prinsiplərinə uyğun olmayan test tapşırıqları tərtib edir və bu zaman heç bir yoxlama, ölçmə mexanizmi tədbiq edilmir. İkinci bir tərəfdən isə, hər il redaktə olunaraq yenidən nəşr edilir. Bütün ailələrdə yuxarı sinifdə oxuyan övladları olmur. Misal olaraq, bu il birinci sinfə respublika üzrə 165 min uşaq gedib və onların 130 minə qədəri ailənin ilk övladı olub. Təbii olaraq bu qədər insanın hamısı olmasa da, müəyyən qismi əlavə resurslardan istifadə edəcək və yenilənmiş həmin vəsaitlər çap olunacaq. Bu vəsaitlərin yeni oxucular üçün yenidən nəşr olunması normaldır, lakin yeni nəşr adı altında kitabın səhifələrinin və ya tapşırıqların yerini dəyişdirmək valideynləri əlavə xərcə salır. Burada ən başlıca problem dərsliklərlə bağlıdır, dərsliklər sadə yazılmalı, yetəri qədər də tapşırıq olmalıdır ki, şagird həmin mövzunu tam mənimsəsin, valideyn əlavə xərcə düşməsin. Eyni zamanda bu tip vəsaitlər hər hansı bir yoxlamadan keçmədiyinə görə bəzən dövlətçilik, milli maraqlarımız və prinsiplərimizə uyğun olmayan informasiyalar,  şəkillər olur və yoxlanılması mümkün olmur. Müəllif nəşriyyata pulunu ödəyir, hər hansı bir yoxlama, redaktə olmadan vəsaitlər çap olunur. Bütün hallarda hər hansı dəyişiklik olunmadan yeni çaplar diqqətdə saxlanılmalıdır.