1990-cı il, qanlı yanvar hadisələri... Bir keçmiş sovet dövlətinin hərb maşınının Azərbaycan xalqına qarşı həyata keçirdiyi qətllər insanlığa qarşı törədilmiş ən ağır cinayətlərdən biri kimi bəşər tarixində qara səhifə olaraq qalacaqdır. Milli azadlığı, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirdi. Bu qanlı hadisələr təbii ki, Bakının 30 kilometrliyində yerləşən Sumqayıtdan da yan ötə bilməzdi... Bəli, həmin gecə Sumqayıt da qurbanlar verdi. Həmin qurbanları bir daha xatırlayaq.

Ağakişiyev Şakir Xandadaş oğlu -1960-cı ildə anadan olmuşdur. H.Z.Tağıyev qəsəbəsinin sakini idi. Orta təhsilini qəsəbədəki 6 saylı məktəbdə almışdır. Sumqayıt Şəhər Qaz İstismar idarəsində çilingər işləyirdi. Az müddət ərzində kollektivin hörmətini qazanan Şakir Ağakişiyev ictimai işlərdə də fəallıq göstərirdi. Yanvar ayının 19-da işdən evə qayıdarkən H.Z.Tağıyev-Sumqayıt yolu kimi tanınan ərazidə Sovet əsgərləri tərəfindən güllələnmişdir.

Baxşəliyev Elçin Mirzə oğlu - H.Z.Tağıyev qəsəbəsində anadan olmuş, orta təhsilini Bakıda 225 saylı məktəbdə almış, sonra isə 56 №li Texniki Peşə Məktəbində davam etdirmişdir. Bakı sərnişindaşıma idarəsində sürücü işləyirdi.1990-cı il yanvarın 19-dan 20-nə keçən gecə imperiya qoşunları Bakıda dinc əhalini vəhşicəsinə qıranda Elçin Baxşəliyev sürdüyü "Kamaz" markalı maşınla tankların qabağını kəsir, həyatı bahasına onlarla insanı ölümdən xilas edir. Həmin gecə Sovet əsgərləri tərəfindən açılmış güllənin qurbanı olur.

Məmmədova Svetlana Həmid qızı - 1939-cu ildə Naxçıvanda anadan olmuş, orta təhsilini də burada almışdır. 1962-ci ildə Azərbaycan Neft və Kimya İnsitutunu bitirmişdir. 1973-cü ildə namizədlik, 1988-ci ildə isə doktorluq dissertasiyasını müdafiə etmişdir.AMEA-nın Polimer Materialları İnstitutunun əməkdaşı, kimya elmləri doktoru, professor idi. 130-dan çox elmi əsərin, 40-dan artıq ixtiranın müəllifi idi. Yanvar ayının 24-də işə gələrkən Bakı-Sumqayıt magistral yolunda Sovet əsgərləri tərəfindən qətlə yetirilmişdir.

Mursaqulov İsmayıl Həsən oğlu - 1939-cu ildə Gürcüstan Respublikasının Marneuli rayonunda anadan olmuş, orta təhsilini də burada almışdır. 1963-cü ildə Bakı Dövlət Universitetini bitirmiş, 1967-ci ildə namizədlik,1985-ci ildə doktorluq dissertasiyasını müdafiə etmişdir. AMEA-nın Polimer Materialları İnstitutunun əməkdaşı, kimya elmləri doktoru, professor idi. 130-dan çox elmi əsərin,15 ixtiranın müəllifi idi. Yanvar ayının 24-də işə gələrkən Bakı-Sumqayıt Magistral yolunda Sovet əsgərləri tərəfindən qətlə yetirilmişdir.

İbrahimov İbrahim İsmayıl oğlu - 1928-ci ildə Naxçıvanda anadan olmuş, orta təhsilini də burada almışdır. 1952-ci ildə Moskva Dövlət Universitetini bitirmiş, 1963-cü ildə namizədlik, 1984-cü ildə doktorluq dissertasiyasını müdafiə etmişdir. AMEA-nın Polimer Materialları İnstitutunun əməkdaşı, kimya elmləri doktoru, professor idi. 140-dan çox elmi əsərin, 50 ixtiranın müəllifi idi. Yanvar ayının 24-də şəxsi maşını ilə işə gələrkən Bakı-Sumqayıt magistral yolunda Sovet əsgərləri tərəfindən qətlə yetirilmişdir.

Ramil Yaquboğlu

Xeberle.com