Şərqi Zəngəzur Regional Təhsil İdarəsinin tabeliyində fəaliyyət göstərən ümumi təhsil müəssisələrinin Azərbaycan dili və ədəbiyyat, ibtidai sinif müəllimləri ilə sertifikatlaşdırma prosesinə dair məlumatverici görüş keçirilib.
Görüşdə çıxış edən Şərqi Zəngəzur Regional Təhsil İdarəsinin müdiri Fuad Bədəlov sertifikatlaşdırma ilə bağlı görülən dəstək tədbirlərinin əhəmiyyətini vurğulayıb, təhsilverənlərə uğurlar arzulayıb.
Çıxış edən Azərbaycan Respublikasının Təhsil İnstitutunun direktoru Rüfət Əzizov sertifikatlaşdırmanın mahiyyəti, məqsədi, test imtahanı və müsahibə mərhələlərinin təşkili, sertifikatlaşdırmanın nəticələrinin təhsilin keyfiyyətinə müsbət təsirindən danışıb.
Görüşdə iştirak edən ARTİ-nin Metodik Dəstək və Peşəkar İnkişaf Mərkəzinin direktoru Nəzakət Mehdiyeva da öz növbəsində sertifikatlaşdırmanın mərhələləri, məzmunu ilə bağlı məsələlər barədə fikirlərini bölüşüb, sertifikatlaşdırmanın nəticələrinin təhsilverənlərin karyera inkişafında, əməyin stimullaşdırılması tədbirlərində nəzərə alınacağını diqqətə çatdırıb.
Daha sonra müəllimlərlə təlimçilər tərəfindən qruplar şəklində görüş keçirilib, təhsilverənlərin sertifikatlaşdırılması imtahanının qiymətləndirmə çərçivəsi müəllimlərə izah edilib, onları maraqlandıran suallar cavablandırılıb.
Xəbərdən istifadə edərkən istinad etmək vacibdir.
