Elm və Təhsil Nazirliyi dövlət ümumi təhsil müəssisələrinə müəllimlərin işə qəbulu (MİQ) üzrə müsabiqənin müsahibə mərhələsinin nəticələrini açıqlayıb.
Nazirlik bildirib ki, 9-18 avqust tarixlərində təşkil olunan müsahibələrdə 4300 namizəd uğur qazanıb.
Bəs müsahibədə kəsilənlər də olubmu?
Avqustun 9-da MİQ-in müsahibə mərhələsinə ümumilikdə 5660 namizəd dəvət olunmuşdu.
Müsahibəyə dəvət olunanlarla uğur qazananların sayını müqayisə etdikdə, məlum olur ki, müəllimləyə xeyli namizəd ya prosesə qatılmayıb, ya da uğursuz nəticə göstərib.
Müsahibə zamanı namizədlərin peşəkar kompetensiyaları, psixoloji hazırlığı və ümumi dünyagörüşü proqrama uyğun olaraq müvafiq komissiya tərəfindən yoxlanılıb.
Elm və Təhsil Nazirliyi müsahibə mərhələsinin nəticələri barədə məlumatı namizədlərin şəxsi səhifələrinə göndərib.
Beləliklə, 1360 namizəd MİQ-in müsahibə mərhələsini keçə bilməyib.
Prosesdə uğur qazanmış 4300 nəfərlə isə ümumi təhsil müəssisələrində müddətsiz əmək müqaviləsi bağlanılacaq.
Müsahibə mərhələsində uğur qazanmayan namizədlər 26 avqust saat 11:00-dan etibarən şəxsi səhifələrinə daxil olaraq apellyasiyaya müraciət edə bilərlər. Apellyasiya müraciətlərinin qəbulu 28 avqust saat 11:00-da başa çatacaq.
Qeyd edək ki, Elm və Təhsil Nazirliyi bu il dövlət ümumi təhsil müəssisələrinə müəllimlərin işə qəbulu üzrə müsabiqəyə ümumilikdə 8 mindən çox vakant yer çıxarmışdı. Müsabiqənin test imtahanı mərhələsində ümumilikdə 58 000-ə yaxın namizəd iştirak etmişdi.(modern.az)
Xəbərdən istifadə edərkən istinad etmək vacibdir.
