Məktəblərdə korrupsiya hallarının qarşısının alınması üçün tədbirlər görülsə də, görünən odur ki, bu tədbirlərə baxmayaraq, direktorlar və müəllimlər öz əməllərindən əl çəkmir. Növbəti rüşvəti halı Sumqayıt Evdə Fərdi Təhsil Məktəbində aşkarlanıb. Vəziyyətlə bağlı Sumqayıt sakini, Evdə Fərdi Təhsil müəlliməsi Sima Mahalova Elm və Təhsil Nazir Emin Əmrullayeva açıq məktubla müraicət edib. Müraciətdə deyilir:
"Hörmətli, Emin müəllim.
Siz hər çıxışınızda müəllimləri tənqid edirsiniz, "şaftalı" sözünü düzgün yaza bilməməkdə günahlandırırsınız. Lakin təhsildə problem "şaftalı"da deyil. Rüşvət təhsili məhv edir. 2023-cü ildir, hələ də Sumqayıt Evdə Fərdi Təhsil Məktəbində dərs bölgüsündə müəllimin bilik və bacarığı yox, rüşvət əsas götürülür. Pul yığan vasitəçilər də bizə deyirlər ki, pulu yuxarıdan istəyirlər. Biz çox inanırıq Abşeron-Xızı Regional Təhsil İdarəsi və Elm və Təhsil nazirliyinin bundan xəbəri yoxdur, amma bu qanunsuzluğun qarşısını kəsməməyiniz haqlı olaraq suallar yaradır. Məktəbə imtahansız direktor təyin etmisiniz, lap yaxşı. Direktor Vladim İbrahimov ötən dərs ilinin sonundan deyib ki, guya bütün müəllimlərə diaqnostik balına görə dərs veriləcək. Lakin kim vasitəçilərlə razılaşırsa, dədə-baba qaydasında dərs saatı alır. Diaqnostik balı yuxarı olanlar dərs saatı ala bilmir, balı aşağı olanlar 30-36 saat dərs alıblar. Bu sizi "şaftalı" sözünün yazılışı qədər narahat etmir? Faktları qeyd edək, bəlkə daxili nəzarəti göndərəsiniz yoxlasın, son 5 ildə 36 saat dərsi olanlar fənnlərini necə tədris ediblər, ümumiyyətlə dərs dedikləri uşaqları üzdən tanıyırlarmı? Məktəb xüsusi təhsil müəssisəsi olduğu üçün müəllimlərin əmək haqqına 50 faiz əlavə də edilir, bu isə 36 saat dərsi olan 55-60 yaşlı 35-40 il stajı olan müəllimlərin ayda 3000-3500 manat maaş alması deməkdir. Ona görə də çəkinmədən 1 saat dərs üçün nə qədər tələb olunsa, verirlər. Nəticə də belə olur ki, diaqnostik balı yuxarı olan kənarda qalır, balı aşağı olan 30-36 saat dərs saatına sahib olur. Həmin müəllimlərin bir neçəsinin adını qeyd edək araşdırın. özünüz şahid olun:
Əliyev Qəhrəman (riyaziyyat) diaqnostik balı 9, dərs saatı 24
Quliyeva Südabə (ibtidai) diaqnostik balı 4, dərs saatı 24
Məmmədova Qətibə (riyaziyyat) diaqnostik balı 7, dərs saatı 22
Məmmədova Nuranə (iryaziyyat) diaqnostik balı 9, dərs saatı 34
Şıxıyeva Yeganə (riyaziyyat) diaqnostik balı 7, dərs saatı 30
Baxışova Tünzalə (riyaziyyat) diaqnostik balı 19, dərs saatı 36
Əhmədova Sunay (tarix) diaqnostik balı 28, dərs saatı 36
İmanov Yadigar (kimya/biologiya) diaqnostik balı 22, dərs saatı 36
İmanova-Babayeva İradə (fizika) diaqnostik balı 21, dərs saatı 34
Abdullayeva Bəyistan (tarix) diaqnostik balı 20, dərs saatı 32
Əslində isə diaqnostik bala uyğun dərs verilsə, bu müəllimlərə 15-18 saatdan artıq dərs verilə bilməzdi. Ancaq yazılmamış və təhsili məhv edən "qanunlar" yenə də öz sözünü deyir. Məktəbin şagirdləri arasında elələri var ki, valideynləri özləri dərs keçirilməsini istəmir. Həmin şagirdlərin dərsləri hansısa müəllimin adına yazılır və mənimsənilir. Ona görə də elə müəllimlər var ki, yalnız pensiya kapitalı yığılsın deyə adını bizim məktəbdə müəllim kimi yazdırıb maaş kartını da rəhbərliyə verib evində oturur. Biz isə əlavə pulumuz olmadığına görə hələ dərs ala bilməmişik, Elm və Təhsil nazirliyi komissiya təşkil edib dərs bölgüsü etməsə, yəqin ki, axırda bizə 7-8 saat dərs verəcəklər. Həmçinin digər dövlət qurumları, Korrupsiyaya Qarşı Mübarizə İdarəsi, Hesablama Palatası da bu məktəbdə yoxlama aparsa, təkcə son 5 ildə məktəbin fəaliyyətti ilə bağlı heç kimin bilmədiyi xeyli qanunsuz faktlar aşkarlana, xeyli vəsait büdcəyə geri qaytarıla bilər. Son 5 ildə 36 saat dərs saatı olanların fəaliyyətinin araşdırılması bəs edər ki, çoxlu qanunsuz hallar aşkar olunsun. Emin müəllim sizdən çox xahiş edirik məktəbimizə düzgün dərs bölgüsü aparmaq üçün, dərsin pulla satılmasına, aşağı bal toplayanlara 30-36 saat dərs verilməsinə son qoymaq üçün komissiya göndərin".
Məsələ ilə bağlı Abşeron-Xızı Regional Təhsil İdarəsinə müraciət etdik. Təhsil İdarəsindən "Xeberle.com"a verilən açıqlamada məsələnin araşdırıldıqdan sonra ictimaiyyətə məlumat veriləcəyi bildirilib.
Aygün İsmayılova
Xəbərdən istifadə edərkən istinad etmək vacibdir.
