Xeberle.com-un əməkdaşı Sumqayıtda ingilis dilini tədris edən müəllimə Adilə Məmmədova ilə hömsöhbət olub.

- Əvvəlcə sizi tanıyaq...

Məmmədova Adilə Zakir qızı...2006-cı ildə Xarici Dillər Universitetinin İngilis dili müəllimliyi fakültəsinə qəbul olmuşam.2010-cu ildə eyni adlı universiteti bitirmişəm. Bir çox özəl sektorda çalışmışam. Ailə həyatı qurduqdan sonra Sumqayıt şəhərində yaşamağa başlamışam. Ailə vəziyyətimlə əlaqəli uzun müddət müəllimlikdən uzaqlaşdım, lakin 5 ildir ki, yenidən müəllimə kimi fəaliyyət göstərirəm.

- Hansı fənni tədris edirsiniz?

İngilis dili…

- Şagirdlərin dərsə davamiyyəti necədir?

Mənim şagirdlərimin davamiyyəti qənaətbəxşdir. Bəzən, tənbəllik etdikləri olur, amma ümumiyyətlə bir - birimizi çox sevirik. Mənim dərsimi buraxmırlar.

- Şagirdlərin dərsdən yayınmasında müəllimlərin rolu nədən ibarətdir, onlar bu məsələdə üzərlərinə düşəni yetərincə yerinə yetirirlərmi?

Müəllimlər fikirləşirlər ki, uşağın davamiyyətsizliyinə səbəb valdeyindir. Bəzi məqamlarda haqlıdırlar. Uşağın təməli ailədə qurulur. Lakin mən xəstə olduğu halda anası "bu gün dərsə getmə,, deyəndə ağlayıb ,”mən KSQ BSQ yazmalıyam, müəllim dərs soruşacaq,, deyə ağlayan uşaq da tanıyıram. Çox yaxşı oxuduğu halda sevmədiyi müəllimin dərsinə girməmək üçün ağlayan uşaq da tanıyıram. Əlbəttə, valdeyin uşağını məktəbə gətirməklə məsuldur. Lakin, mənim fikrimcə məktəbi uşağa müəllim sevdirir. Buna görə də dərsə davamiyyətin müəllimin də məsuliyyətində olduğunu düşünürəm.

- Aylıq maaşınız ehtiyaclarınızı ödəməyə yetirmi?

Çox şükür. Müəllimlər gözü tox insanlar olur. Biz fəaliyyətimizin qarşılığını maddi olaraq almasaq da mənəvi olaraq bundan çox razı qalırıq. Lakin, mən kifayyət etmədiyini düşünmürəm.

- Müəllim olmaq seçiminizi ailəniz necə qarşıladı?

- Mən demokrat bir ailədə böyümüşəm. Seçimlərimə daima dəstək görmüşəm. Çox sevinmişdilər, daima da qürurla danışarlar. Allah canlarına dəyməsin.

- Dərsdən əlavə nə ilə məşğul olursunuz?

Məni tanıyanlar bilir ki, mən kitab oxumağı çox sevirəm. Atamdan keçib mənə…Çox vaxt kitab oxuyuram. Hətta, ev işləriylə məşğul olanda da audio kitab dinləyirəm. Məsləhət görürəm, çox gözəl tətbiqdir.

- Bəzən müəllim və şagird münasibətləri düzgün qurulmadığından çox ciddi problemlər üzə çıxır. Bəs sizdə vəziyyət necədir, bu cür problemlərlə qarşılaşmısınızmı?

Çox şükürki,bu günə qədər belə bir neqativ halla rastlaşmamışam.Lakin, yuxarı sinif uşaqlarıyla çalışmaq doğurdan da çox çətindir. Hətta, deyərdim ki, evdə basdırdıqları aqressiv duyğularını müəllimdən çıxardırlar. Lakin, biz də həm anayıq, həm də müəllimə...Çalışırıq onları da anlayaq və ortaq bir yol tapıb davam edək.

- Sumqayıtda təhsil sistemini necə qiymətləndirirsiniz?

Hər sahədə olduğu kimi əlbəttə ki, müəyyən axsaqlıqlar var. Əsas odur ki, neqativ halların aradan qaldırılması üçün çalışılır.

- Şəhərimizdə hansı yenilikləri görmək istəyərdiniz?

Ümumilikdə gənclərimizin adından deyim ki, əyləncə fəaliyyətlərinin artmağını çox istəyirlər. Kiçik yaşlı uşaqlara belə həftəsonu keçirdəcəkləri çox az məkan var və yaxud da bahadırlar. Bulvarımız son illər çox gözəlləşib. Lakin atraksionların yetərli olmadığını düşünürəm. Elm cəhətdən əsas təmir olunmalı bir çox məktəbimiz var. Sağlam təhsil üçün gələcək nəsillərimizi sağlam yetişdirmək üçün həm də təmiz səliqəli məkanlara ehtiyac var. Mən "bizim vaxtımızda məktəb belə idi” sözünü qəbul etmirəm, 21-ci əsrdə bu söz qətiyyən bizə yaraşmır. Bizim borcumuz bizə miras qoyulanı inkişaf etdirib, gələcək nəsilə örnək olmaqdır. Yerimizdə saymaq deyil. Fənnlər üzrə mən çox istərdim ki, hər məktəbdə ingilis dilində dinləmə otaqları üçün şərait yaradılsın. Conversationlar keçirə bilmək üçün xarici vətəndaşlarla və ya ixtisasında üstünlük qazanmış şəxslərlə görüş təyin edilsin.Kitab sərgiləri məktəblərdə təşkil edilsin. Oxumağı uşaqlara aşılayaq. Məktəb kitabxanalarına yeni xarici dillərdə ədəbiyyatlar olsun ki, mən uşağa get al deyəndə gedib götürə bilsinlər. İngilis və rus dilində hər sinifin səviyyəsinə uyğun bədii ədəbiyyatlar olsun ki, uşaqlar özlərini inkişaf etdirsinlər.

Söhbətləşdi: Elşən Yəhyayev