25 dekabr 2024-cü il tarixində AZAL-a məxsus təyyarəmizin qəzaya uğraması xəbəri hər bir soydaşımızı dərindən məyus etdi. Qısa zaman sonra təyyarəmizin Rusiyanın hava hücumundan müdafiə sisteminə aid raketlə vurulması xəbərini eşitməyimiz bizi həm sarsıtdı, həm də hiddətləndirdi. Beynəlxalq hüququn norma və prinsiplərinə hörmətlə yanaşan, həmsərhəd dövlətlərlə mehriban qonşuluq münasibətləri saxlamaq, səmərəli əməkdaşlıq münasibətləri formalaşdırmaq üçün bütün lazımi addımları atan dövlətimizə və xalqımıza qarşı belə bir cinayət əməlinin törədilməsi heç şübhəsiz ki, yolverilməz bir haldır. Bakıdan Qroznı şəhərinə uçan sərnişin təyyarəmizin Çeçenistan ərazisində Rusiyanın hava hücumundan müdafiə sisteminə aid raketlə vurulmasında günahı olan şəxslər aşkara çıxarılmalı və ədalətli şəkildə cəzalandırılmalıdırlar. Bu həm Azərbaycan dövlətinin rəsmi mövqeyi, həm də eyni zamanda beynəlxalq hüququn tələbidir.
Azərbaycan Televiziyasına verdiyi müsahibəsində dövlət başçımız Cənab İlham Əliyev AZAL-a məxsus təyyarəmizin Qroznı şəhəri yaxınlığında raketlə vurulması ilə bağlı Rusiya dövlətindən gözləntilərimizi və tələblərimizi aydın şəkildə diqqətə çatdırdı. Cənab İlham Əliyev qeyd etdi ki, qəzadan sonra mənim göstərişimə əsasən Rusiyanın bəzi şəhərlərinə uçuşlar dayandırılıb. Bunun əsas səbəbi təbii ki, təhlükəsizlik məsələləridir. Çünki Rusiyanın bir çox şəhərlərində vaxtaşırı hava məkanı bağlanır, orada xüsusi əməliyyat rejimi tətbiq edilir. Onlar buna "kavyor əməliyyatı” deyirlər. Bir məsələnin də də üstü açılmalıdır ki, o "kavyor əməliyyatı” nə vaxt elan edilib? Çünki bizdə olan məlumata görə, artıq təyyarəmiz xarici təsirə məruz qaldıqdan sonra o "kavyor əməliyyatı” elan edilib. Yəni, əgər bu belədirsə, bir daha göstərir ki, yerli xidmətlər bu məsələni ört-basdır etmək üçün belə ediblər. Dövlət başçımız əlavə etdi ki, biz öz tələblərimizi açıq şəkildə Rusiya tərəfinə bildirmişik. Dekabrın 27-də artıq bu tələblər rəsmi qaydada onlara çatdırıldı. Birincisi, Rusiya tərəfi Azərbaycandan üzr istəməlidir. İkincisi, öz günahını etiraf etməlidir. Üçüncüsü, günahkarları cəzalandırmalıdır, cinayət məsuliyyətinə cəlb etməlidir və Azərbaycan dövlətinə və zərərçəkən sərnişin və ekipaj üzvlərinə təzminat ödəməlidir. Bu, bizim şərtlərimizdir. Onlardan birincisi artıq dünən təmin edildi. Mən ümid edirəm ki, digər şərtlərimiz də qəbul ediləcək. Bütün bu şərtlər ədalətlidir. Burada hər hansı bir fövqəladə tələb, yaxud da ki, məsələ yoxdur və bu, beynəlxalq təcrübəyə və normal insani davranışa əsaslanır.
Azərbaycan Respublikasının Prezidenti Cənab İlham Əliyev baş vermiş bu hadisəyə xüsusi həssaslıqla yanaşır. Azərbaycan ictimaiyyəti məsələnin bütün tərəfləri barədə ətraflı şəkildə məlumatlandırılır və məlumatlandırılacaq. Xalqımız heç bir halda hadisəyə ədalətsiz yanaşmanı qəbul etməyəcək. Rusiya Federasiyası və onun rəhbərliyi dövlət başçımızın və xalqımızın haqlı tələbinə hörmətlə, həssaslıqla yanaşmalıdır. Hər bir soydaşımız ümid edir ki, Rusiya tərəfi baş vermiş faciəvi hadisə ilə bağlı ədalətli araşdırma aparacaq və günahkarlar layiqli cəzalarını alacaqlar.
Vasif Səfiyarov
YAP Sumqayıt şəhər təşkilatının məsləhətçisi
Xəbərdən istifadə edərkən istinad etmək vacibdir.
