Milli peşəkar teatrın 149 yaşı tamam oldu. Xalq oyunlarının, meydan tamaşalarının tarixi kökləri qədimdir. Təsadüfi deyil ki, elə ilk peşəkar teatrımızın da özülündə yer tutan "Sərgüzəşti -Vəziri xan Lənkəran" komediyası meydan - məzhəkə oyun üslubunda qurulmuşdu. 149 ildir Azərbaycanda teatr adlı cazibədar bir sənət tamaşaçılarının yoluna işıq salır. Ayrı-ayrı bölgələrdə, müxtəlif janrlar üzrə ixtisaslaşmış sənət ocaqları fəaliyyət göstərir.
Sumqayıt Dövlət Dram Teatrı da elə milli teatr bayramı ərəfəsində 1968-ci ildə yaranıb. Bu gün teatr həm milli teatr bayramını, həm də özünün yaranmasını qeyd edir. Bu ikiqat bayram Sumqayıt Teatrında maraqlı bir formada qeyd olunub.
Əvvəlcə dəvət olunmuş şəhər ictimaiyyəti, ziyalılar, qonaqlar teatrın baş rejissoru, Xalq artisti Firudin Məhərrəmovun quruluşunda Mirzə Fətəli Axundzadənin "Müsyo Jordan və Dərviş Məstəli Şah" komediyasına baxıblar. Əsərin səhnə həlli, uğurlu eksperimenti diqqət çəkib.
Tamaşada Əməkdar artistlər Fərqanə Musayeva, İlahə Səfərova, Cəlal Məmmədov, aktyorlar Oktay Mehdiyev, Akif Mirzəyev, İlham Səfərli, Vəfa Qurbanova, Yeganə Məmmədvəliyeva, Məryəm Hüseynli, Ceyhun Məhərrəmov, Habil Xanlarov və Etibar Əmirov rol alıb.
Teatrın direktoru, Əməkdar artist Mübariz Həmidov qonaqları salamlayaraq teatr sənətinin mədəni-ictimai, sosial həyatda tutduğu önəmli yeri diqqətə çatdırıb. Diqqət və qayğıya görə Mədəniyyət Nazirliyinə, şəhər rəhbərliyinə, habelə şəhərin müvafiq qurumlarına minnətdarlıq bildirib.
Direktor bildirib ki, bu il teatrın bayramına Sumqayıt Şəhər Gənclər və İdman İdarəsi də kreativ layihə ilə qoşulub. Təşkilat bir qrup yaradıcı gənci mükafatlandıracaq.
Görüşdə Sumqayıt teatrının keçdiyi şərəfli yolu xatırlanıb və qeyd edilib ki, bu sənət ocağı hər zaman yaradıcılıq konsepsiyası, üslub zənginliyi və repertuar siyasəti ilə seçilib.
Sumqayıt Gənclər və İdman İdarəsinin rəisi Elgün Hümbətov dövlətimizin gənclər siyasətindən danışıb, bütün sferalarda, o cümlədən mədəniyyət sektorunda da gənclərin özlərini təsdiqi üçün gərəkən şəraitin və qayğının yaradıldığını dedi.
Digər çıxış edənlər ümummilli lider Heydər Əliyevin teatra doğma münasibətini xatırladılar. Prezident İlham Əliyevin və Birinci vitse-prezident Mehriban Əliyevanın mədəniyyət sahəsinə xüsusi qayğısından söz açıblar. Vurğulanıb ki, bu gün Sumqayıt Dövlət Dram Teatrı peşəkar heyəti ilə şəhər ictimaiyyətinin rəğbətini qazanıb. Kollektivdə istedadlı gənclər çalışırlar.
Sonda Sumqayıt Dövlət Dram Teatrının rejissoru Fuad Kazımov, aktyorlar İlqar İbrahimov və Etibar Əmirov Milli Teatr Günü münasibətilə mədəniyyət naziri Anar Kərimovun imzaladığı fəxri fərman təqdim edilib. Habelə Sumqayıt Gənclər və İdman İdarəsinin rəhbərliyi tərəfindən aktyor oyununda məharət göstərmiş bir qrup truppa üzvü fəxri fərmanla təltif olunub.
