Bu gün Azərbaycanın bütün bölgələri, şəhər və kəndləri, qəsəbələri kimi, Sumqayıt şəhəri də yeni dövrünü yaşayır. Azərbaycan Prezidenti İlham Əliyevin ölkə həyatının bütün sahələrinə olduğu tək, təhsil sektoruna da göstərdiyi diqqət və qayğı nəticəsində bu sahədə islahatlar daha da dərinləşib.
Ötən yazılarımızda qeyd etdiyimiz kimi, Sumqayıt məktəbliləri müxtəlif olimpiada və müsabiqələrdə də aktiv iştirak edərək, yüksək nəticələr göstərirlər.
Növbəti müsahibəmizi də Sumqayıtın istedadlı şagirdlərindən birinə həsr etdik. Sumqayıtın xüsusi bilik və bacarıqlara, istedada, olimpiada nailiyyətlərinə görə fərqlənən şagirdlərindən biri də Renat Əmiraslanovdur.
Xeberle.com-un əməkdaşı 14 yaşlı Renatla həmsöhbət olub:
- Səni yaxından tanıyaq.
- Əmiraslanov Renat Mövsüm oğlu. 15 mart 2010 -cu ildə Sumqayıtda doğulmuşam. İstedad liseyinin 9-cu sinif şagirdiyəm. Kiçik yaşlarımdan oxumağa çox həvəsim, fərqli marağım olub. Bu maraq məni daim xarici olimpiadaları araşdırmağa və orada iştirak etməyə həvəsimi artırıb.
- Hansı müsabiqələrdə qalib olmusan?
- Qalib olduğum olimpiadaları sadalayım:
* 2022-ci il 12 fevral Teeneagle English Compitetion Azərbaycan - qızıl medal.
* 2023-cü il 4 mart Teeneagle English Compitetion Azərbaycan - qızıl medal.
* 2023-cü il 30 iyul - 6 avqust tarixində Londonda Teeneagle olimpiadasının finalında 2 kateqoriya üzrə 2 gümüş medal.
* 2024-ce il 11 fevral Azərbaycanda FİSO beynəlxalq olimpiadasında gümüş medal.
* 2024-cü il 2-3 mart tarixində Robotex Avrasiya Çempionatında 3-cü yer.
* 2024-cü il 22-26 iyun Dubayda FİSO olimpiadasının finalında ingilis dili üzrə briliant dünya kuboku, dünya birincisi.
* 2024-cü il 21 aprel Türkiyə Beynəlxalq Riyziyyat Olimpiadası Azərbaycanda bürünc medal.
- Olimpiadalarda iştirak etmək şagirdlərə əlavə hansı üstünlükləri qazandırır?
- Bu yarışlarda iştirakım və qələbələrim təhsilə olan həvəsimi birə min artırır, daha da uğurlu olmağa köklənirəm.
- Hansı fənnə marağın daha çoxdur?
- Hər bir fənni oxuyuram. Dünyagörüşlü olmaq üçün hər sahədə bilgili olmaq lazımdır. Tarix, riyaziyyat və ingilis dilinə bir başqa həvəsim var.
- Gələcəyə dair planların nədir?
- Gələcəkdə diplomat olmaq istəyirəm. Şagird olaraq öncə ən yaxşı universitetin tələbəsi olmaq üçün çalışıram. Yenə də xarici olimpiadaya hazırlaşıram.
- Asudə vaxtını necə dəyərləndirirsən?
- 9-cu sinifdə təhsil aldığımdan asudə vaxtım həddən artıq azdır. Vaxt tapan kimi idmanla, əsasən boksla məşğul oluram ki, bu da mənə daha çox motivasiya verir.
- Sumqayıtda təhsil həyatını necə qiymətləndirirsən?
- Sumqayıt təhsili uğurları, şagirdlərin bilik nəticələri ilə hər zaman ön sıralardadır və respublikamızda öz uğurları ilə seçilir.
- Sumqayıt təhsili sənə nə qazandırıb?
- Təhsil aldığım "İstedad" liseyi Sumqayıt təhsilinin ən uğurlu hissəsidir - deyərdim. Liseyimizin direktoru Rasim Süleymanov olimpiada mövzusunda mənə çox kömək olub. Bu gün də müəyyən yarışlara, olimpiadalara hazırlşıram və dəstəyini məndən əsirgəmir. Bunun üçün Rasim müəllimə təşəkkür edirəm.
- Şəhərimizdə hansı yeniliklərin tətbiq edilməsini istəyərdin?
- Gənc nəslin daha çox dəstəklənməsini istərdim.
- Olimpiada zamanı müəllimlərə ünsiyyətinə icazə verilirdi?
- İstər London, istərsə də Dubayda müəllimlərlə çox gözəl, isti münasibət, səmimi ünsiyyət yaranmışdı. Hər bir mövzuda bizə kömək olurdular. Dubayda "Springdales school"da, Londonda "Oxford", "Cambridge" universitetlərinə baş çəkərək oranın təhsili ilə yaxından tanış oldum.
- Olimpiadaya hazırlıqlar zamanı əsasən nələrə diqqət edirdin?
- Olimpiadalara hazırlıq zamanı motivasiya, intizam və özgüvən çox vacibdir. Hər bir işdə hədəf və məqsəd olmalıdır.
- Bu uğurlarınla bağlı Təhsil Nazirliyi tərəfindən sizə dəstək gəldimi?
- Uğurlarımla bağlı təəsüf ki, Təhsil Nazirliyindən dəstək olmadı. İnanıram ki yaxın gələcəkdə bunun əksini görəcəyik. Oxuduğum məktəbdən mənəvi dəstək hiss etmək - bəzən bu belə bəs edir.
- Müxtəlif ölkələrin təmsilçiləri və təhsil sistemlərinin mübarizəsində bəyəndiyiniz hansı sistem var ki, onun ölkəmizdə tətbiqini istərdin?
- Təhsil sistemində dərs yükünün azaldılması, praktiki təhsilə üstünlük verilməsini istərdim. Gələcəyin diplomatı olaraq dövlətimə, xalqıma xeyirli vətəndaş olmaq üçün daim çalışacağam. Bunun üçün də təhsil mütləqdir.
– Bizə vaxt ayırdığın üçün təşəkkür edirəm.
– Sağ olun.
Söhbətləşdir: Elşən Yəhyayev
Xəbərdən istifadə edərkən istinad etmək vacibdir.
