"İstəyirik ki, sinfimiz isti olsun, bufetimiz olsun”. 
Lent.az-ın Region TV-yə istinadən məlumatına görə, bu Şəkinin Muradbəyli kəndinin vaqonda dərs keçən şagirdlərinin arzularıdır.

 Onlar da həmyaşıdları kimi müasir təhsil innovasiyalarından istifadə etmək, dərslərini əyani vəsaitlərlə keçmək istəyirlər. Qatar vaqonunda yerləşən bu məktəbdə iki sinifdə 4 şagird təhsil alır. Bu müəssisə Xocalıdan olan məcburi köçkünlərin uşaqları üçün yaradılıb. Lakin təhsil üçün normal şərait olmadığından valideynlər digər kəndlərə üz tutublar. Bütün valideynlər bu yolu seçə bilmir. İmkanı olmayan ailələr övladlarının vaqonlarda dərs keçməsinə razılaşmalı olurlar. Vaqon məktəbdə normal müəllimlər otağı belə yoxdur. Sakinlərin öz zəhməti hesabına yaratdıqları bu təhsil ocağında dərs demək də olduqca çətindir.

Qaçqınlarla iş üzrə Dövlət Komitəsinin Şəki şəhəri üzrə nümayəndəliyindən bildirilib ki, bu il dövlət proqramında Muradbulaq kəndində yaşayan sakinlər üçün yeni qəsəbə və məktəbin salınması nəzərdə tutulmayıb. Bu isə o deməkdir ki, bu uşaqlar hələ bir müddət də vaqonları qatarın hissəsi kimi yox, sinif otağı kimi təsəvvür edəcəklər.