Sumqayıt şəhər İcra Hakimiyyətinin başçısı Zakir Fərəcov şəhid general-mayor Polad Həşimovun anası Səmayə Həşimovanın evində olub. Şəhər rəhbəri ailənin qayğıları ilə maraqlanıb, Polad Həşimov üçün ayrılmış guşəyə baxış keçirib.
Xeberle.com məlumat verir ki, torpaqlarımızın işğaldan azad edilməsi, respublikamızın ərazi bütövlüyünün təmin olunması qəhrəmanlıq simvoluna çevrilmiş general Polad Həşimovun arzusu idi. Prezidenti, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsi nəticəsində ölkəmizin ərazi bütövlüyü təmin olundu, torpaqlarımız işğaldan azad olundu. Polad Həşimovun və digər şəhidlərimizin qisası döyüş meydanında alındı.
Bildirilib ki, Polad Həşimov Azərbaycan xalqının qəlbində əbədi olaraq yaşayacaq.
Qeyd edək ki, Polad Həşimov Qəbələ rayonunun Vəndam kəndində anadan olub. Ailələri ilə birgə Sumqayıt şəhərinə köçdüyündən Sumqayıt şəhər 28 və 34 nömrəli məktəblərdə orta təhsil alıb. Heydər Əliyev adına Azərbaycan Ali Hərbi Məktəbinə bitirən P. Həşimov taqım komandirliyindən "general-mayor” ali hərbi rütbəsinədək yüksəlib.
Polad Həşimov 14 iyul 2020-ci il tarixdə Ermənistan-Azərbaycan sərhədinin Tovuz rayonu istiqamətində düşmən təxribatlarının qarşısını alarkən qəhrəmancasına şəhid olub. Azərbaycan Respublikası Prezidentinin 9 dekabr 2020-ci il tarixli Sərəncamı ilə ölümündən sonra "Azərbaycanın Milli Qəhrəmanı” fəxri adına layiq görülüb.
Xəbərdən istifadə edərkən istinad etmək vacibdir.
