2025-ci ilin "Konstitusiya və Suverenlik İli” elan olunması və Sumqayıt şəhərinin Azərbaycanın Gənclər Paytaxtı seçilməsi münasibətilə 19 may 2025-ci il tarixində Sumqayıt Gənclər Evində "Gənclik və Qadınların Gücü: Hüquqi Dövlət və Suverenlik Uğrunda” mövzusunda ictimai əhəmiyyətli tədbir keçirilib.
Xeberle.com xəbər verir ki, tədbir Yeni Azərbaycan Partiyası Sumqayıt şəhər təşkilatı, Azərbaycan Respublikasının Gənclər və İdman Nazirliyinin Abşeron-Xızı regional idarəsi və Sumqayıt Gənclər Evinin birgə təşkilatçılığı ilə baş tutub.
Tədbirin məqsədi gənclərin və qadınların hüquqi dövlət quruculuğunda, eləcə də milli suverenliyin möhkəmləndirilməsindəki rolunu vurğulamaq, onların ictimai fəallığını təşviq etmək olmuşdur.
Tədbirdə Milli Məclisin deputatı Mehriban Vəliyeva, Sumqayıt Gənclər Evinin rəhbəri Nərgiz Nağıyeva, Sumqayıt Tibb Mərkəzinin direktor müavini və Perinatal Mərkəzin rəhbəri Təranə Rəcəbli çıxış ediblər. Çıxışlar zamanı hüquqi maarifləndirmə, qadınların liderlik potensialı, gənclərin dövlətçiliyin inkişafındakı rolu və cəmiyyətin vətəndaş iştirakçılığına ehtiyacı kimi vacib məsələlər müzakirə olunub.
Tədbirdə iştirak edən gənclər və qadın fəallar arasında canlı fikir mübadiləsi aparılıb, suallar cavablandırılıb və gələcək əməkdaşlıqlar üçün ideyalar müzakirə edilib.
Tədbir sonda iştirakçılara təşəkkür və motivasiya dolu çağırışlarla yekunlaşdırılıb. Qeyd olunub ki, bu cür görüşlərin davamlı keçirilməsi, ölkədə gənclərin və qadınların cəmiyyətin müxtəlif sahələrində daha fəal iştirakına zəmin yaradır.
Xəbərdən istifadə edərkən istinad etmək vacibdir.
