"Cari tədris ilinin sonuna yaxınlaşırıq. İllik tədris proqramının əksəriyyətinə əməl edilib, şagird, müəllim, valideyn münasibətlərini demək olar ki, tam həll edilməsinə nail olmuşuq. Bu ilki nailiyyyətlərimiz keçən ilkinə nisbətən daha çox olacaq.”

Bu sözləri Xeberle.com-a açıqlamasında Sumqayıt şəhər 9 nömrəli tam orta məktəbin direktoru Bəhruz Səlimxanov deyib. B. Səlimxanov bildirib ki, cari ildə 66 nəfər şagird XI sinfi bitirir: "Onların böyük hissəsi ali məktəblərə sənəd vermiş arzularına çatmaq üçün yorulmadan çalışırlar.”

Məktəb direktoru açıqlamasında Sumqayıt Təhsil Şöbəsinin yeni müdiri Ruhiyyə Tağıyevanın fəaliyyətinə də münasibət bildirib. B. Səlimxanov təhsil şöbəsinin müdirinin bir çox məktəblərə, o cümlədən rəhbərlik etdiyi tədris müəssisəsində şəxsən reydlər keçirdiyini qeyd edib: "O, qısa zaman kəsiyində məktəbimizdə iki dəfə olub. Ruhiyyə xanım bacarıqlı bir təhsil işçisi kimi öz irad və təkliflərini bildirib. Onun məktəbimizə diqqət və qayğısı şagird və müəllim kollektivini daha da ruhlandırıb. Ruhiyyə xanım təhsil işini hərtərəfli bildiyindən bizə verdiyi təkliflər yerinə düşdü. Hamıya məlumdur ki, cari dərs ili 14 gün uzadılmışdır. Bu yenilik şagird və müəllimlər üçün bir qədər çətin olmasına baxmayaraq çalışacağıq ki, bu işin öhdəsindən layiqincə gələk. Bunun üçün Ruhiyyə xanımın göstərişi ilə valideyn iclasları keçirərək maarifləndirmə işini gücləndirmişik. Bu ərəfədə şagirdlərimizi müxtəlif görməli yerlərə, ekskursiyalara cəlb etmişik.”

O, cari dərs ilini müvəffəqiyyətlə başa vuracaqlarına əminliyini ifadə edib.