Ötən gün bütün dünyada olduğu kimi, Azərbaycanda da Beynəlxalq Müəllimlər Günü kimi qeyd edilir.
Sumqayıt məktəblərinin ölkənin təhsil həyatındakı yeri xüsusidir: qəbul imtahanlarında şəhərimiz ən yaxşı nəticəni göstərən şəhərlərdəndir, sumqayıtlı məzunlar beynəlxalq müsabiqə və yarışlarda da olduqca yüksək nailiyyətlər qazanırlar.
Ancaq bütün bunlar o demək deyil ki, şəhərin təhsil müəssisələrində problemlər yoxdur. Şəhər İcra Hakimiyyətinin başçısı Zakir Fərəcov bu problemləri təhlil edərək, məktəblər qarşısında proqram xarakterli tələblər qoyub. Təhsil ocaqları işini yeni standartlara uyğun olaraq qurmaq üçün səylə çalışır. Belə məktəblərdən biri də 9 nömrəli orta məktəbdir.
Şəhərin nisbətən ucqarında, İnşaatçılar qəsəbəsində yerləşən məktəb 1958-ci ildən etibarən fəaliyyət göstərir.
Müəllimlər günündə mərkəzdən uzaqlaşmaq, şəhərin ən yaşlı məktəblərindən birinə üz tutmaq qərarına gəldik. 9 saylı məktəb bu günü fərqli formatda qeyd edirdi: direktor kürsüsündə şagird əyləşmişdi. Fürsətdən istifadə edib məktəbin məktəbin leqal və formal direktoru ilə söhbətləşdik:
- Rüstəm, özünü necə hiss edirsən?
- Çox yaxşı.
- Böyüyəndə nə olmaq istəyirsən?
- İndiki kimi direktor.
- Hansı məktəbin?
- Elə 9 saylı məktəbin. 9 saylı məktəb mənim ikinci evimdir.
- Hansı fənləri xüsusi olaraq sevirsən?
- Ana dili, rus dili, riyaziyyat.
- Məktəb direktoru kimi hansı işləri görmək istərdin? Hansı dəyişiklikləri etmək istərdin?
 - Mən bir dəfə 12 saylı məktəbdə imtahanda olmuşdum. Çox xoşuma gəldi. Əgər direktor olsaydım, öz məktəbimizi də o məktəbin səviyyəsində çatdırmaq istərdim, təmirli, səliqəli.
- Uşaqlara daha çox azadlıq vermək istərdin, yoxsa əksinə daha çox intizama cəlb edərdin?
- Yox, bundan artıq azadlıq verməzdim. Ki, şimarmasınlar.
- Türk filmlərinə çox baxırsan deyəsən?
- Bəli (gülür).
- Məktəbdə hansı fərqli tədbirlər keçirmək istərdin?
- Məsələn, uşaqların ad günlərini.
- Bəs onda onlar sənin təbirincə desək, şımarmazlar?
- Şımararlar. Hamısına yox, ona görə də bəzilərinə icazə verərdim.
 
Bəhruz Səlimxanov: 2011-ci ildən etibarən 9 saylı məktəbin direktorudur. İxtisasca riyaziyyatçıdır. Bir neçə vəsaitin müəllifidir.
- Bəhruz müəllim, məktəb neçə yerlikdir?
- Məktəb layihə üzrə 624 yerlikdir. Hazırda isə məktəbimizdə 38 sinifdə 887 şagird təhsil alır. 
- Son 5 il ərzində məktəbdə hansı keyfiyyət dəyişikliklərinə nail ola bilmisiniz?
-2011-ci ildə məktəbin qəbul göstəricisi cəmi 26 faiz idi. Sonrakı illərdə biz nəticələri yaxşıya doğru dəyişə bildik. 1 il öncə Şəhər Icra Hakimiyyətinin başçısı cənab Zakir Fərəcov məktəblər qarşısında belə bir tələb qoydu ki, bütün məktəblərin nəticəsi 70 faizdən yuxarı olmalıdır. Bu, məsuliyyət hissimizi artırdı, biz də kollektiv qarşısında müəyyən tələblər qoyduq. Artıq ötən il məktəbimiz qəbul imtahanlarında 73 faiz nəticə göstərdi. Hesab edirik ki, bu, Zakir müəllimin uğurudur, onun müəyyən etdiyi standartlar sayəsində məktəbimiz də nəticələrini yaxşılaşdırdı. 3 nəfərimiz 600 baldan yuxarı bal topladı, hörmətli Zakir müəllim onları hədiyyələrlə mükafatlandırdı.
Məktəbimiz məsafəcə şəhərin mərkəzindən uzaq olsa da, nəticələrinə görə mərkəzi məktəblərə yaxınlaşıb. 
İnanırıq ki, biz bu tempi qoruyacağıq və növbəti illərdə daha yaxşı nəticələr göstərəcəyik.
- Bilirik ki, məktəblər təkcə qəbul imtahanlarının nəticələrinə görə yox, həm də digər yarış və müsabiqələr üzrə yarışırlar. 9 saylı məktəb bu baxımdan hansı nəticələri göstərir?
- Əvvəllər bizim idman uğurlarımız olsa da, təhsil və elmi müsabiqə və olimpiada qaliblərimiz yox idi. Şagirdlərimizdən biri layihə olimpiadasında bürünc, beynəlxalq olimpiadada isə gümüş medal qazanıb. Həmin məzunumuz Nübar 604 balla Qafqaz universitetində təhsil alır.
İdmanın müxtəlif sahələri üzrə şəhər və ölkə miqyaslı yarışlarda həmişə yaxşı nəticələrimiz olub, bu gün də bu göstəricilər qənaətbəxşdir.
- Məktəbin maddi-texniki bazası necədir?
- Məktəbin ikinci, əlavə korpusu 2009-cu ildə tikilib. Ancaq əsas korpus 1957-ci ildə tiklib və yalnız bu il bir qədər təmir etmişik.
Ölkəmizdə 4500-ə qədər orta ümumtəhsil məktəbindən 3000-i artıq əsaslı təmir olunub. Ümid edirik ki, bizim məktəbdə yaxın zamanlarda o siyahıya düşəcək. Bu, şübhəsiz ki, məktəbimizdə tədrisin keyfiyyətinə, nəticələrə ciddi şəkildə təsir edər.
- Məktəbinizdə hansı tədbirlər keçirilir?
- Hər ay fənn aylıqları və konfransları keçirilir. Əlamətdar günlərlə bağlı tədbirlər bizdə ənənəvi xarakter daşıyır.
Eyni zamanda, Ulu öndər Heydər Əliyevin anım günü ilə bağlı hər il məktəbimizdə konfranslar təşkil edilir.
Bu cür tədbirlərə qonaqlar dəvət edir, onlarınpedaqoji heyətlə, şagirdlərlə görüşünü təşkil edirik.
Ötən illərdə millət vəkili Musa Qasımlı, bir neçə ay öncə isə millət vəkili Tahir Mirkişili məktəbimizdə qonaq olub.
- Bu tədris ilində hansı gözləntiləriniz var?
- Bu il də biz qarşımıza qoyulan tələb üzərində işləyəcəyik.. Çalışacağıq ki, nəticələrimizi daha da yaxşılaşdıraq.
Bildiyiniz kimi, bu günlərdə cənab Prezidentin Sumqayıta səfəri reallaşdı. Bu, bizim üçün tarixi bir səfər idi. Dövlət başçısı şəhərimizdə höbaşçılığı ilə həyata keçirlən infrastruktur layihələri, yenidənqurma və abadlıq işləri ilə tanış oldu və bu işləri çox yüksək qiymətləndirdi.
Möhtəşəm Heydər Əliyev Mərkəzində keçirilən toplantıda mən də iştirak edirdim və buna görə özümü xoşbəxt hiss edirəm, Hesab edirəm ki, bu, tarixi bir an, tarixi görüş idi.
Biz bu gün gözəlləşən, yenidən qurulan bir şəhərdə yaşayır və işləyirik. Belə halda, bizim də üzərimizə böyük məsuliyyət düşür. Biz də bu inkişaf tempi ilə ayaqlaşmalı, nəticələrimizi, keyfiyyət göstəricilərimiz daha da yaxşılaşdırmalıyıq.
- Bir qədər də mümkünsə, şagird parlamentiniz barədə.
- Bəli, bizim məktəbimizdə şagird parlamenti fəaliyyət göstərir. Bu parlamentin mahiyyəti ondan ibarətdir ki, hər il bir gün bir şagird məktəb direktoru seçilir və məktəbi o, idarə edir, onun qərarları icra edilir. Eyni zamanda kafedra müdirlərini şagirdlər əvəz edir, dərsləri şagirdlər aparır, şagirdə proqram verilir və müəllim və idarəedici ampluasında çıxış edir. Bu gün də həmin gündür və Rüstəm Məsiyev məktəbə rəhbərlik edir. Bu, hesab ediirk ki, kreativ bir təşəbbüsdür, Sumqayıtda yalnız "Təfəkkür" lieyində və bizim məktəbdə həyata keçirilən bir layihədir.
Bu ideya şagirdlərin müəllimlik sənətini sevməsinə, şəxsiyyət kimi formalaşmasına və idarəetmə bacarıqlarına yiyələnməsinə xidmət edir.
Sonda Rüstəmdən direktor kürsüsünün bəxş etdiyi hiss barədə soruşduq.
- Rüstəm, direktor kimi necə hiss edirsən özünü?
- Yaxşı. Çox yaxşı.