Avropanın ən böyük tələbə assosiasiyası olan Avropa Tələbələr Forumunun (AEGEE-Avropa) növbəti ümumi yığıncağı (AGORA) İspaniyanın Burqos şəhərində keiçirilib.

"Payız AGORA”sında Azərbaycanı Gənclər və İdman Nazirliyinin dəstəyi ilə "Avropa Tələbələr Forumu-Bakı" İctimai Birliyi (AEGEE-Bakı) sədri Orxan Babayev və "Avropa Tələbələr Forumu-Sumqayıt" İctimai Birliyinin (AEGEE-Sumqayıt) sədr müavini Orxan Ədalətli təmsil ediblər.

AGORA-da Avropanın müxtəlif şəhərlərində fəaliyyət göstərən yerli AEGEE nümayəndəliklərindən 800 nəfərdən çox gənc iştirak edir və AEGEE-nin gələcək layihələrini və planlarını müzakirə edirlər. Həmçinin, AEGEE-Avropanın yarımillik fəaliyyət hesabatı bütün şəbəkəyə təqdim olunur.

Bildirək ki, AGORA, AEGEE-Avropa təşkilatının ümumi yığıncağıdır və ildə iki dəfə keçirilir. AEGEE-Bakı Avropanın 40 ölkəsinin 270-dən çox akademik şəhərində fəaliyyət göstərən və özündə 20 000 tələbəni birləşdirən AEGEE-Avropa təşkilatının Bakı şəhəri üzrə yerli nümayəndəliyidir. Təşkilatın əsas məqsədi Avropada gənclər arasında mədəni mübadilə həyata keçirməklə qitə miqyasında açıq və tolerant cəmiyyətlərin inkişafına nail olmaqdır.  (salamnews.org)