Tədbirlərdə rayon İcra Hakimiyyətinin başçısı Malik İsaqov başda olmaqla, RİH-nin məsul işçiləri, idarə müəssisə rəhbərləri, məktəbin müəllim və şagird kollektivi, valideynlər iştirak ediblər.

Bu səpkidən olan tədbirlərdən biri də Qubadlı rayon Mahruzlu kənd orta məktəbində təşkil olunub.

Tədbirdə öncə Azərbaycan Respublikasının Dövlət Himni səslənib. Yığıncaq açıq elan edildikdən sonra çıxış edən RİH-nin başçısı Malik İsaqov Azərbaycan xalqının ümummilli lideri Heydər Əliyevin təhsilin inkişafına, müəllimlərə həmişə böyük diqqət və qayğı ilə yanaşdığını, bu işi dövlət siyasətinin mühüm bir sahəsi hesab etdiyini bildirib: "Bu gündə təhsil sahəsi Prezidentimiz İlham Əliyevin qayğı ilə yanaşdığı sahələrdən biridir. "

Başçı qeyd edib ki, təhsil müəssisələrində çalışan işçilərin əmək haqlarının və tələbələrin təqaüdlərinin artırılması haqqında Azərbaycan Respublikasının Prezidentinin Sərəncamları, habelə, Bakı şəhərinin və onun qəsəbələrinin sosial-iqtisadi inkişafına dair Dövlət Proqramlarının icrası və Heydər Əliyev Fondunun Prezidenti Mehriban xanım Əliyevanın "Yeniləşən Azərbaycana yeni məktəb Proqramı” və digər bu kimi tədbirlər dövlətimizin təhsil sahəsinə göstərdiyini diqqətin bariz nümunəsidir.

Sonra M. İsaqov Qubadlı rayon məktəblərinin uğurlarından bəhs edərək vurğulayıb ki, rayonda 32 ümumtəhsil məktəbi fəaliyyət göstərir ki, onlardan 10-u yeni tikilib, 21-i əsaslı təmir olunub. Eyni zamanda 2017-ci ildə Qubadlı rayon Xanlıq kənd ümumi orta məktəbi üçün yeni bina tikilərək şagird və müəllim kollektivinin istifadəsinə verilib. Bu il rayon məktəblərini bitirən 491 məzundan 419 nəfər ali məktəblərə sənəd verib. Onlardan 301 nəfər tələbə adını qazanıb. Ali məktəbə qəbul olan məzunlardan 49 nəfəri 500-600, 16 nəfəri isə 600-700 arası bal toplayıb.

Digər çıxış edənlər qeyd ediblər ki, ölkənin hər bir yerində müasir standartlara cavab verən ümumtəhsil məktəblərinin tikilir, bu isə öz növbəsində gənc nəslin savadlı və sağlam əqidəli yetişməsinə xidmət edir.

Bu il məktəbə ilk dəfə qədəm qoyan birincilərə uğurlar diləyərək hər birinin gələcəkdə dövlətimiz və cəmiyyətimiz üçün savadlı və yararlı vətəndaş olaraq yetişmələrini arzulayıblar.

"İlk zəng”in səslənməsi ilə yeni dərs ilinə başlanılıb.