Statistik rəqəmlərə görə, 13 yaşa qədər uşaqların göz xəstəliklərində son 10 ildə iki dəfəyə yaxın artım var. 2007-ci ildə ilk dəfə diaqnoz qoyulan belə uşaqların sayı 15min 402 olubsa, keçən il bu rəqəm 26 mini keçib. Pedaqoqların fikrincə, müasir zamanda balaca "alimə bənzər”lərin sayının çoxalmasında "uzaq görməyən” valideynlərin payı heç də az deyil. Gündəlik 8-9 saat dərslərlə məşğul olan məktəblinin valideyndən nümunə götürərək saatlarla komputerə aludə olması da görmə zəifliyinə səbəb olur. Bu gün mobil telefonun kiçik monitoruna saatlarla zillənən balaca nəslin gözü çətin ki, "sabah”ı yaxşı görə bilsin. Böyüklər öz məsuliyyətini müasir texnologiyaların üzərinə atır. Aşağı sinifdə uşaqlara həvalə olunan lazımız dərs yüklənməsi, əlavə repetitor hazırlıqları da gözdə müəyyən problemlərin yaranmasına gətirib çıxarır. Mütəxəssislər həyəcan təbili çalır. Dərslə daha çox məşğul olan, xüsusilə komputer arxasına oturan uşaq hər yarım saat, 15 dəqiqədən bir fasilə etməli, gözünü uzaq nöqtələrə zilləməli, göz idman hərəkətləri etməlidir. Bu gözü dincəldir, spazmanın qarşısını alır. Bundan əlavə təmiz hava, lazımi miqdarda maye qəbulu və təbii qida rasionu da vacib faktorlardandır. A, E, C, B2 vitaminləri, omeqa 3 və omega 6 yağ turşuları, sink, maqneziumla zəngin qidalara üstünlük vermək lazımdır. Görünən odur ki, hər ailə mütəmadi olaraq övladını oftalmoloqa göstərmir. Halbuki, heç bir narahatlıq olmasa belə uşaqlar ildə bir dəfə göz müayinəsindən keçməlidir.