Şəhərin idarə və müəssisələrində, elm və təhsil ocaqlarında Novruz bayramına həsr olunmuş silsilə tədbirlər bu qədim və milli bayrama sevginin bu gün də azalmadığının göstəricisidir.

Belə tədbirlərdən biri də Sumqayıt şəhərindəki 39 saylı uşaq bağçasında keçirilib. Tədbiri giriş sözü ilə açan Sumqayıt şəhər İcra Hakimiyyətinin nümayəndəsi Günel Qiyasova uşaqları, onların valideynlərini, bağçanın kollektivini və tədbirə dəvət almış qonaqları bayram münasibətilə təbrik edib, onlara əmin-amanlıq, ruzi-bərəkət və firəvan həyat arzulayıb.

Bağçanın müdirəsi Esmira Musayeva da çıxış edərək Novruz bayramının ən qədim bayramlardan biri olduğunu deyib. E. Musayeva xalqımızın bu günə qədər yaşatdığı, qoruyub gələcək nəsillərə ötürdüyü bu bayramın müstəqillik qazandıqdan sonra daha böyük təmtəraqla qeyd olunduğunu bildirib. O, milli adət-ənənələri özündə əks etdirən, bolluq-bərəkət rəmzi sayılan Novruz bayramı münasibətilə  kollektivi təbrik edib və xoş arzularını çatdırıb.

Uşaqların ifasında rəngarəng musiqi çələngi, vətənə, sülhə, bahara həsr olunmuş maraqlı şeirlər və səhnəciklər təqdim olunub.

Kosa və Keçəlin məzəli oyun və söhbətləri uşaqlarda xoş əhval-ruhiyyə yaradıb.

Bayram tədbiri uşaqların rəqsləri ilə davam edib.