Qərbi Kaspi Universiteti bu ilin fevralında məktəblilər arasında elan etdiyi esse müsabiqəsinə yekun vurub.
Universitetdən bildirilib ki, ümummilli lider Heydər Əliyevin anadan olmasının 95 iliyinə həsr olunmuş müsabiqəyə 100-dən artıq məktəbdən 300-dək məktəbli müraciət edib, onlardan 200-dək esse müəllifinin yazısı müsabiqə şərtlərinə uyğun olduğu üçün ikinci mərhələyə buraxılıb. Universitetin müəllimlərindən ibarət münsiflər heyətinin qiymətləndirməsindən sonra ilk üç yerin qalibi məlum olub.
Qaliblərin mükafatlandırılması mərasimində çıxış edən universitetin rektoru, professor Andris Leitas məktəbliləri təbrik edib, onlara təhsillərində və gələcək həyatlarında uğurlar arzulayıb. Rektor məktəblilərin iştirakı ilə mütəmadi olaraq tədbirlərin keçirildiyini, hazırda Bakı və regionlarda robototexnika təlimlərinin davam etdirildiyini diqqətə çatdırıb. Universitetdə son illərdə tədrisin keyfiyyətinin artırılmasına yönəlmiş proqramların və infrastruktur layihələrin reallaşdırıldığını diqqətə çatdıran A.Leitas qeyd edib ki, bu tədris ilindən etibarən mühəndislik ixtisasları üzrə kadr hazırlığı aparan universitetdə Yüksək Texnologiyalar və İnnovativ Mühəndislik Məktəbi, eləcə də tələbələrin praktik layihələr üzərində işləməsi üçün Texnopark qurulub. Texnoparkda məktəblilərin iştirakı ilə işlənilən layihələrdən biri Türkiyədə keçirilən beynəlxalq müsabiqədə finala vəsiqə qazanıb.
Universitetin müəllimi, tanınmış şair Vaqif Bəhmənli müsabiqənin nəticələri barədə məlumat verib.
Daha sonra mükafatlandırma mərasimi keçirilib, qaliblərə hədiyyə və sertifikatlar təqdim olunub.
Sonda tələbələrin hazırladıqları ədəbi-bədii kompozisiya nümayiş etdirilib.
Xəbərdən istifadə edərkən istinad etmək vacibdir.
