Millət vəkili, BDU-nun professoru Kamilə Əliyeva məktəblərdə dərs yükünün ağır olmasından narazıdır.
Millət vəkili bu yöndə narazılığını Milli Məclisin (MM) Elm və təhsil komitəsinin bu gün keçirilən iclasında dilə gətirib.
Millət vəkili deyib ki, bu məsələ cəmiyyətdə də ciddi müzakirə olunmaqda və narazılıqlar yaratmaqdadır:
"Ona görə hesab edirəm ki, orta məktəblərdəki dərs yükü sadələşdirilməlidir. Dərsliklərin vəziyyəti olduqca bərbaddır. Bir dəfə demişəm, indi də deyirəm ki, dərsliklər daha çox orta məktəb müəllimlərinin özləri tərəfindən yazılmalıdır.
Bu, daha xeyirli və effektli olar. Bununla yanaşı, rus məktəblərindəki ədəbiyyat fənni üzrə dərsliklər çox bərbad vəziyyətdədir. Başa düşmək olmur ki, oradakı şeirlər, hekayələr haradan götürülüb, kimlər tərəfindən yazılıb?! Nə başı var, nə ayağı. Uşaqlar çox əziyyət çəkirlər. Bunlar təcili aradan qaldırılmalıdır”.
Millət vəkili Pərvin Kərimzadə isə təklif olunan dəyişiklikləri müsbət saydığını və dəstəklədiyini bildirib:
"Hesab edirəm ki, ali məktəblərə qəbul sadələşdirilməlidir. Bu, heç də test üsulunun aradan qaldırılması demək deyil. Bu, mütərəqqi üsuldur. Düşünürəm ki, qəbul sadələşdirilməlidir”.
Xəbərdən istifadə edərkən istinad etmək vacibdir.
