"Azərbaycan Tibb Universitetində gələn ildən ailə həkimi ixtisası üzrə rezidentlərin təhsil almasını təmin ediləcək”.
Bu sözləri Azərbaycan Tibb Universitetinin ailə təbabəti kafedrasının müdiri Mustafa Salihov"Ailə həkimi institutunun inkişafının yeni mərhələsində icbari tibbi sığortanın rolu" mövzusunda keçirilən tədbirdə çıxışı zamanı deyib.
Onun sözlərinə görə, səhiyyədə ailə həkimi institutunun rolunun gücləndirilməsinə ehtiyac var.
"Rezidenturanı bitirənlər "Ailə həkimi” ixtisasına yiyələnəcəklər”.
Kafedra müdiri həmçinin qeyd edib ki, 2002-ci ildə ATU-da poliklinik terapiya kafedrasının bazasında ailə təbabəti kafedrası yaradılıb.
Daha sonra Səhiyyə Nazirliyinin Kadrlar, elm və təhsil şöbəsinin aparıcı məsləhətçisi Təranə Əhmədova ailə həkiminin fəaliyyət istiqamətləri, işinin təşkili və vəzifələri barədə görüş iştirakçılarına geniş məlumat verib. O, ailə həkiminin ilkin səhiyyə xidmətinin göstərilməsindəki rolundan bəhs edərək, gələcəkdə bu sahə üzrə kadrlara böyük ehtiyac duyulacağını qeyd edib.
Qeyd edək ki, bu gün İcbari Tibbi Sığorta üzrə Dövlət Agentliyinin (İTSDA) təşəbbüsü və Səhiyyə Nazirliyinin (SN) dəstəyi ilə Azərbaycan Tibb Universitetində (ATU) "Ailə həkimi institutunun inkişafının yeni mərhələsində icbari tibbi sığortanın rolu" mövzusunda tələbə və rezidentlərlə görüş keçirilib. Görüşdə İTSDA-nın Səhiyyə departamentinin səhiyyə siyasəti və kliniki kodlaşdırma şöbəsinin müdiri Şərafət İsmayılova çıxış edərək, iştirakçılara icbari tibbi sığorta sistemi çərçivəsində ailə həkimi institutunun inkişafının vacibliyini bildirib, tələbələri bu sahənin gələcək perspektivləri və beynəlxalq təcrübəsi haqqında məlumatlandırıb. İlkin səhiyyə sisteminin inkişafı üçün Agentliyin həyata keçirtdiyi pilot layihə müddətində qazanılmış təcrübəni iştirakçılarla bölüşən Ş.İsmayılova, tələbələrə səhiyyənin yeni iqtisadi modelinin qurulmasında gənc kadrlara ehtiyac olacağını bildirib və bu sahə üzrə tələb olunan qaydalar haqqında məlumat verib.
Xəbərdən istifadə edərkən istinad etmək vacibdir.
