Ölkəmizdə yeni tədris ilinin bir ayı artıq başa
çatmaqdadır. Hər il məktəblilər tədris ilinin başlamasını həyəcanla gözləsələr
də, bəzi uşaqlar sağlamlıq imkanlarının məhdudluğu səbəbindən bu həyəcanı
yaşamaqdan məhrumdurlar. Bu uşaqlar orta təhsilini məktəbdə deyil, ev şəraitində
davam etdirmək məcburiyyətindədirlər.
Sumqayıt
Psixoloji-Tibbi-Pedaqoji Komissiyanın sədri İsa Tərlanovun Xeberle.com-a verdiyi məlumata görə
Psixoloji-Tibbi-Pedaqoji Komissiyanın qərarı ilə bu il ümumi olaraq 470 nəfər sağlamlıq imkanları məhdud
uşaq təhsilə cəlb olunub: "Həmin uşaqlardan 181 nəfəri evdə, 289 nəfəri isə
ümumi orta təhsil səviyyəsində təhsil alır ki, bunlardan da 7-si əqli qüsurlu
uşaqlar üçün nəzərdə tutulmuş internat tipli məktəbdədir”.
İ.Tərlanov həmçinin bildirib
ki, evdə təhsilin təşkili mövcud
qanunvericilikdə nəzərdə tutulduğu kimi həyata keçirilir. Belə ki, evdə fərdi
qaydada təhsil alan şagirdlər müvafiq təhsil müəssisəsinə xəstəxanaların,
poliklinikaların, dispanserlərin təqdim etdiyi sənədlər əsasında rayon, şəhər
psixoloji-tibbi-pedaqoji komissiyaların qərarı ilə qəbul olunurlar:
"Bundan başqa evdə fərdi təhsilə ümumtəhsil məktəblərinə cari ilin 1
sentyabrınadək 6 yaşı tamam olan, xüsusi məktəblərdə isə (əqli cəhətdən
qüsurlu) 7 yaşı tamam olan səlahiyyətinə görə ümumtəhsil məktəblərində oxuya
bilməyən uşaqlar cəlb edilirlər. Bunun üçün valideyn məktəb direktorunun adına ərizə
yazmalı, doğum haqqında şəhadətnamənin surətini, müvəffəqiyyət cədvəli (ilk dəfə
təhsilə cəlb edilənlər istisna olunmaqla), şagirdlərin şəxsi işi (ilk dəfə təhsilə
cəlb edilənlər istisna olunmaqla), yaşayış yerindən arayış, psixoloji-tibbi-pedaqoji
komissiyanın göndərişini məktəbə təqdim etməlidir".
O da qeyd olunub ki, evdə təhsilə cəlb olunmuş şagirdlərə dərslər
tədris planına uyğun olaraq ixtisas müəllimləri tərəfindən keçilir. Həmin müəllimlərə
dərs bölgüsü aparılarkən məktəb Pedaqoji Şurasının qərarına əsasən müəyyən
edilir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
