Mikayıl Cabbarovun təhsil naziri təyin edilməsindən sonra nazirlikdə və ali məktəblərdə aparılan kadr dəyişikliyi davam edir.

Bu gün nazirin əmri ilə Azərbaycan Müəllimlər İnstitutunun (AMİ) Gəncə filiailının direktoru Ramiz Məmmədov tutduğu vəzifəsindən azad edildi. Xatırladaq ki, hazırda təhsil nazirliyi AMİ-nin bir neçə filialında ciddi yoxlamalar aparır.

Bunların sırasında AMİ-nin Sumqayıt filialı da var. “Xəbərlə”yə məsələyə yaxın mənbələrdən verilən məlumata görə, İnstitutun Sumqayıt filialının bağlanacağı haqda məlumat var.

Bu xəbər filialın özünə qədər gəlib çıxıb. Belə ki, xəbər institut kollektivinin böyük narahatlığına səbəb olub. Bu narahatlıq bitməmiş yaxın günlərdə Sumqayıt filialının direktorunun da dəyişdiriləcəyi xəbəri yayılıb.

Hazırda Sumqayıt Dövlət Universitetinin rektoru Nadir Qəhrəmanovdan sonra Azərbaycan Müəllimlər İnstitutu Sumqayıt filialının direktoru Raya Nəcəfovanın da işdən uzaqlaşdırılacağı haqda məlumatlar dolaşır. Mənbədən verilən məlumata görə yeni direktor Azərbaycan Milli Elmlər Akademiyasının müxbir üzvü, 60 yaşlı professordur.

Müəllimlər İnstitutunun Sumqayıt filialından isə bizə bildirdilər ki, direktor Raya Nəcəfovun işdən uzaqlaşdırılması ilə bağlı məlumatlar həqiqətəuyğun deyil.

"Xəbərlə"xəbər portalı