Ümummilli lider Heydər Əliyevin həyat və fəaliyyətinin, zəngin irsinin daha dərindən öyrənilməsi məqsədilə respublikamızın digər şəhər və rayonlarında olduğu kimi, Sumqayıtda da ümumtəhsil məktəblərinin XI sinif şagirdlərinə müəyyən olunmuş mövzular üzrə sonuncu açıq tarix dərslərinin keçirilməsi müvəffəqiyyətlə davam edir.

AzərTAc xəbər verir ki, Sumqayıt şəhərindəki Heydər Əliyev Mərkəzində keçirilən “Ulu Öndər Heydər Əliyev müstəqil Azərbaycanın memarı və qurucusudur” mövzusuna dair açıq dərslərdə indiyədək şəhərin 48 tam orta məktəbindən 3382 şagirdlə yanaşı, bu şəhərdə məskunlaşan Qubadlı, Füzuli, Cəbrayıl, Zəngilan, Laçın rayonları məktəblərinin XI siniflərində təhsil alan 413 nəfər də iştirak edib.

Hər açıq dərsin əvvəlində şagirdlər Mərkəzdə Ulu Öndərin həyat və fəaliyyətinə dair zəngin eksponatlarla tanış olublar.  Açıq dərslərdə şagirdlərə müstəqilliyimizin ilk illərində Azərbaycanda mövcud olan ictimai-siyasi vəziyyət barədə geniş məlumat verilmiş, dahi şəxsiyyətin uzaqgörən siyasəti nəticəsində ölkəmizin müstəqilliyinin daha da möhkəmləndiyi beynəlxalq aləmdə nüfuzunun artdığı məktəblilərin diqqətinə çatdırılmışdır. 1993-cü ilin ortalarınadək ölkədə tənəzzülə uğrayan iqtisadiyyat, inflyasiya, işsizlik, siyasi iflas ulu öndər Heydər Əliyevdən əvvəl hakimiyyətdə olanların bacarıqsızlığının, uğursuz daxili və xarici siyasətlərinin məntiqi nəticəsi kimi xarakterizə olunub.

Dərslərdə 1993-cü ilin iyununda Ulu Öndərin xalqın təkidli tələbi ilə Naxçıvandan Bakıya gəlişi, iyunun 15-də Azərbaycan Ali Sovetinin sədri seçilməsi, gərgin fəaliyyəti nəticəsində ölkədə vətəndaş müharibəsi təhlükəsinin və separatçı meyillərin qarşısının alınması, siyasi sabitliyin yaranması, 1993-cü il oktyabrın 3-də Prezident seçilməsi, cəbhədə atəşkəsin təmin edilməsi və digər məsələlər əsaslandırılmış dəlillərlə diqqətə çatdırılıb.

Şagirdlər ümummilli lider Heydər Əliyevin hakimiyyətə qayıdışından sonra Azərbaycanın dünya iqtisadiyyatına inteqrasiyası, “Əsrin müqaviləsi”nin imzalanması və milli neft strategiyasının əsasının qoyulması, Azərbaycanın dünyanın enerji və siyasi xəritəsində mövqeyinin möhkəmlənməsi, hüquqi və demokratik dövlət quruculuğu sahəsində həyata keçirilən tədbirlər barədə dolğun məlumat əldə ediblər.

Sonda ümummilli lider Heydər Əliyevin Vətənə, xalqa bağlı şərəfli ömür yolundan bəhs edən videofilm nümayiş olunub.