Yeni təhsil mərkəzlərinin yaradılmasının təhsilimizdə hansı müsbət və ya mənfi dəyişikliklərə səbəb olacağı haqda millət vəkili Tahir Mirkişilinin fikirlərini öyrəndik. O bildirdi ki, Sumqayıtda peşə təhsilinin inkşaf etdirilməsi ilə bağlı həmisə müzakirələr aparılıb: "Hesab edirəm ki, daim inkşafda olan, yeni sənaye parkları açılan Sumqayıtda peşə təhsilinin inkşafı zəruridir. Bu baxımdan da verilən qərar müsbət yönümlü dəyişiklər yaradacağına inanıram. Sumqayıtda açılan yeni kimya sənaye parklarının ixtisaslaşmış kadrlara ehtiyacı var. Sənaye şəhəri olan Sumqayıtda daha çox mühəndislik, eyni zamanda texnika və texnologiyaya aid biliklərə malik kadrlara ehtiyac var. Təhsil sahəsində atılan addımlar ümumilikdə peşə təhsilini ikinci dərəcəli təhsildən yüksək dərəcəli ixtisas hazırlığı səviyyəsinə qaldırmaqdır və bu sahədə işlər davamlı olacaq”, - deyə deputat söyləyib.

Təhsil üzrə ekspert Elşən Qafarov isə qeyd edib ki, təhsildə hər hansı bir dəyişiklikdən başlanılması özü də böyük addımdır. "Ötən illərdən maddi texniki bazanın möhkəmlənməsi məqsədi ilə vəsait ayrılsa da, peşə təhsili pilləsində islahatlara 2017-ci ildən başlanılıb. Artıq bu sahədə yeni kurikulum proqramının tətbiqi ilə bağlı müəyyən addımlar atılıb. Lakin peşə təhsilinin fəlsəfəsi ondan ibarətdir ki, istər bu təhsili verən bütün pillələr, o cümlədən də peşə təhsili, əmək bazarının tələblərinə uyğun olaraq işçi kadrlar hazırlamalıdır. Eyni tipli peşə məktəblərinin birləşdirilməsindən dəyişikliyin əldə olunması mümkün olmasa da, peşə təhsilində addımların atılması təqdirəlayiqdir. Bir müəssisəni bağlayıb, digərinə birləşdirmək, maddi texniki bazayla təmin etmək, bunlar hamısı profilaktik tədbirlərdir və bununla yalnız görünüş yaratmaq olar ki, hansısa islahatlar aparılır, addımlar atılır. Peşə təhsilində həqiqətən dəyişiklik əldə etmək istəyiriksə, mütləqdir ki, əmək bazarının tələbləri öyrənilsin. Və söhbət Sumqayıt peşə məktəblərindən gedirsə, vacibdir ki, Sumqayıt və ətraf rayonların əmək bazarı nəzərə alınaraq peşə təhsili sistemində islahatlar aparılsın. Nə qədər ki, əmək bazarının tələblərini öyrənən qurum yaradılmayacaq, təhsildə hansı dəyişikliklər olunsa da, üzdə yaxşı görünsə də, mahiyyət olaraq heç nə dəyişməyəcək. Aparılan islahatlar alqışlansa belə, həmin peşə məktəbində tədris olunan ixtisaslar və həmin ixtisaslar üzrə təhsil alan tələbələrin oxuyub bitirdikdən sonra iş tapa bilməsi üçün əmək bazarı mütləq nəzərə alınmalıdır”, - deyə ekspert söyləyib.

Qeyd edək ki, Dövlət Peşə Təhsil Mərkəzlərinin maliyyələşdirilməsi dövlət büdcəsinin mərkəzləşdirilmiş xərclərinin "Təhsil” bölməsində Təhsil Nazirliyi üçün nəzərdə tutulmuş vəsait hesabına həyata keçiriləcək.

Xədicə Səxavətqızı

Xeberle.com